FA Cup Quarterfinal Rinkai pathum City, Arsenal leh Spurs

Manchester City-in Nilaini zanah Stoke City lama goal an khung theih loh avangin Premier League nomawi chawi turin vanneihna an mamawh a, zanina an khelh tur FA Cup hi Pep Guardiola season hmasa bera nomawi a taka an beisei ngam awmchhun niin a lang tawh.

Middlesbrough-in an mual Riverside Stadium-ah City hi vawiin tlai dar 5:45 hian an mikhual ang a, Sony ESPN-ah a en theih ang. Zanin dar 11:00 hian Emirates Stadium-ah Arsenal-in League One club Lincoln City FC an mikhual ang a, London club hian Bayern Munich laka an mualphona hliah khuh nan club tenau lakah an thinrim hrik thlak an tum dawn a ni.

Pathianni zan dar 7:30 hian Tottenham Hotspur-in White Hart Lane-ah League One club Millwall FC an mikhual ang a, FA Cup quarterfinal zinga ngaihven hlawh ber erawh Thawh­ṭanni zana Chelsea leh Man­chester United inkhel tur a ni.

Record nei ṭha Boro

Middlesbrough hian FA Cup-a vawi nga Manchester City an hmachhawn tawhah vawi li hnehna an chang thei a, an hneh hnuhnun ber chu 2014-15 season fourth round niin Aitor Karanka hnuaiah an khel tawh a, Championship club an la ni bawk.

City tana harsatna belhchhah turin Pep Guardiola hote hian Nilaini zanah Monaco nen Champions League last 16 an khel dawn a, Spanish manager hian Stoke City an draw ṭuma David Silva leh Raheem Sterling a dah ṭhat sual tawh avangin Boro hmachhawn tur player thlan kawngah a fimkhur phah sawt ang.

Liverpool player hlui Ster­ling hian FA Cup match hnuhnung parukah vawi nga assists a nei a, chung zinga pahnih chu Huddersfield nen fifth round replay an khelh ṭuma thleng a ni.

Manchester City manager Pep Guardiola chuan, "Middles­brough hneh turin rilrua kan inpeih a ṭul a ni," tiin Stoke City nena an inhnehtawk ṭumin a sawi a, Spa­nish manager hian inelna pathum an la hmachhawn avanga player chhawr kual a ṭul thu a sawi tel bawk.

Boro hian Inrinni khan City chelh thei Stoke hi khualmualah 0-2 in an hneh lo a, tun season league-ah goal 19 chauh an khung a, goal khung tlem ber niin relegation zone-ah an awm. Middlesbrough boss Aitor Karanka chuan, "Boro ka zawm tirh kha ka tan hun harsa a ni a, chairman khan ka chunga rinna a nghah thu min hrilh a, he thu hi nitina min hrilh a ṭul lo," tiin club hotuten a chunga rinna an nghah thu a sawi.

Beisei sang lo

Lincoln City-in quarterfinal an lut a, kum 103 hnua non league club a sang pariat zinga inhlangkai thei hmasa ber an ni. League One club hmachhawn tur Arsenal hi Bayern Munich lakah 10-2 zeta chak zo lo hlim ni mah se Lincoln tan chuan club lian an ni.

Football team a enkawl hmaa school-a zirtirtu ni ṭhin Danny Cowley chuan, "Emi­rates Stadium-a Arsenal hmachhawn, mipui 60,000 hmaah ka bul lawkah Arsene Wenger a awm dawn. Ka club enkawl hmasak ber Concord Rangers ka kaihhruai hmasak ber ṭum khan Sawbridgeworth kan hmachhawn a, 6-1 in kan chak a, entu zat chu 62 a ni," tiin a sawi a, kum 10 liam taa thil thleng leh tun hun danglam thu a sawi chhuak.

Lincoln manager Cowley chuan sawi chhunzawmin, "Arsenal hi kan hneh thei a, amaherawhchu kan chakna chance chu vawi 1000 hma­chhawnah vawi khat a ni. Burn­ley kha Turf Moor-ah vawi 100 hmachhawn ila, vawi li kan in­hnehtawk ang a, vawi khat chu kan chak ang. Kan vanneih ṭum kan tawng a ni," tiin chak tura vanneihna an mamawh thu a sawi.

Arsenal tan semifinal kal­kawng a inhawng zau a, amah­erawhchu manager laka lungawi lo Gunners supporter-ten zanin hian goal tam tak khungin hnehna pawh chang mah se French manager Arsene Wenger chungah an lawm chuang lo ang.

Kane a langsar

Tottenham striker Harry Kane-a'n tun season match 28-ah goal 24 a khung tawh a, FA Cup match khat lek la khel mah se goal thum a khung tawh. Goal khung theih vangin Kane hi a langsar a, zaninah erawh a loan-a a khelhchhuahna Millwall a hmachhawn dawn avangin en bik a hlawh ang.

Kane hian 2011-12 season khan kum 18 leka upa niin Millwall-ah loan-in a kal a, English striker hian match 27 khelhah goal kua khungin Championship aṭanga tla thei dinhmun aṭangin a chhan chhuak. Spurs striker Kane chuan, "Hma ka sawn theihna chhan an ni a, an bula khelh kha nuam ka ti a, relegation battle avang khan player puitling zawk ka nih theih phah a ni," tiin a club hlui chungchang sawi.

Zaninah erawh Millwall hi Kane a elpui an nih avangin English striker hian amah chher hriamtu lamah hian goal khung a tum dawn a ni.

FA Cup - Quarterfinal Fixtures
Zanin Inkhel Tur
Middlesbrough 5:45 PM Manchester City
Arsenal 11:00 PM Lincoln City
March 12, Pathianni
Tottenham Hotspur 7:30 PM Millwall
March 13, Thawhtanni Zan
Chelsea 1:15 AM Manchester United