Season tawpah Alonso a chawl dawn
Bayern Munich midfielder Xabi Alonso chuan season tawpa a contract zawh rualin inkhelh a chawlhsan tur thu a tichiang ta. Spain international chuan, "Ka hringnun, ka hmangaih, football mangṭha le," tiin twitter lamah a chawlh tur thu hi a tarlang a ni.
Spanish midfielder Alonso chuan, "Thutlukna awlsam tak a ni lo a, mah se tun hi a hun diktak chu niin ka hre si. Nakin hun rei taka football chawlhsan chauh ai chuan tun hi a hun dik tak chu niin ka hria a, nuam la ti viau mah ila ka chawlh hi a hun ve tawh a ni," a ti.
Spain tana vawi 114 inlan thei midfielder hian kum 2004 khan Real Sociedad aṭangin Liverpool a zawm a, Anfield-a a season hmasa berah Champions League nomawi chawi nghalin Istanbul khawpuia AC Milan laka inlehthalna ropui thlentirtu team-ah a tel a, English club tana a khelh chhungin FA Cup, UEFA Super Cup leh Community Shield-a chawi bawk. Alonso hian a football career-a pawi a tih ber chu Premier League-a Liverpool a champion pui loh a nih thu a sawi ṭhin.
Kum 2009 khan Reds manager Rafael Benitez-a'n mamawh tawh loa a inhriat avangin Real Madrid lam a pan a, kum 2014-a Germany lama a pem hmain Spanish club hi Champions League leh La Liga nomawi a chawipui hman. Bayern Munich-ah season hnih hun hmang tawhin Bundesliga nomawi vawi hnih lai a chawipui leh der tawh a, German Cup-ah vawi khat a champion bawk.
Arsenal laka 5-1 a chak hlim Bayern hian zanin dar 8-ah league match khel turin Eintracht Frankfurt an mikhual dawn a, Bundesliga-ah point sariha hma an hruai fal mek avangin Spanish midfielder hian nomawi chawi chungin football-a mangṭha ngei dawn niin a lang.
Spain tana goal 16 khung tawh Alonso hian club mai piah lamah ram tan pawh nomawi chawi theih ang chu a chawi kim hle a, FIFA World Cup 2010-a champion team zinga a tel bakah Euro 2008 leh 2012-ah nomawi a chawi bawk. August 2014 khan ram tana inkhelh a chawlhsan thu a lo puang tawh.