Rostov lakah United chungnung lo

Olymp-2 Stadium, Russia-ah Manchester United-in mualneitu FC Rostov aiin goal an khung tam zawk thei lo a, Jose Mourinho hote tana Henrikh Mkhitaryan-a goal khung chu Russian club tan Aleksandr Bukharov-a'n sutin 1-1 in an inhnehtawk.

Europa League Last 16 first leg hi March 16 zanah Old Trafford-ah khelh a ni lehnghal dawn a, hemi hma hian United-in Thawhṭanni zan khian FA Cup quarterfinal-ah Chelsea hmachhawn turin Stamford Bridge an tlawh bawk ang.

Khelmual zira game plan

Jose Mourinho chuan in­khelh ṭan hmaa thuthar thehdarhtuten an kawm ṭumin khelmual ṭhat loh thu a sawi a, season ṭan hmaa Manchester City nena Beijing khawpuia an inkhel tur pawh Rostov khelmual Olymp-2 Stadium ang thoa ṭha lo a nih avanga ṭhulh a nih thu a sawi lang bawk. Khelmual a ṭhat loh avangin United boss-in a player luhtir dan tur thlenga hriatthiam a har thu a sawi lang bawk.

Inkhelh hun a thleng a, Por­tuguese manager remruatna aṭangin United an fimkhur tih a lang nghal. Defence laiah Phil Jones, Chris Smalling leh Marcos Rojo te an inrem a, Ashley Young leh Daley Blind ten wing back hna thawk telin defence tih khawng nan Marouane Fellaini leh Ander Herrera te chu tlarhnung pui turin an awm bawk.

League leh FA Cup lama match thum hrem Zlatan Ibrahimovic chu tlarhmaah mal tlatin Henrikh Mkhitaryan chu Swede striker hnungah zalen taka dah niin Paul Pogba-a'n midfield a luah lum a, goalkeeper chu Sergio Romero a ni.

A awlsam lo

Red Devils hian Russia chhim club hmachhawn turin 6,035 km zet an zin a, English club hian anmahni ṭantu mi 238 te chu visa atana senso an tum sak a, khua a vawh avangin inelna neihna hmunah hian kawmawl an pe vek bawk.

Minute 35-naah Fellaini leh Ibrahimovic thawhrah sengin Mkhitaryan-a'n goal hmahruai a khung a, he goal hi minute 53-naah Bukharov hmangin Rostov-in an sut. Mualneitu midfielder Timofei Kalachev-a'n mual laiah hun thawl a nei a, defence leh keeper inkarah tak ball vawrh lutin Bukharov hian dam thlapa la thlain keeper Romero dan hman lohin a pet goal nghal.

Inkhelhna mual a ṭhat loh avangin inkhel a hmuhnawm tawk lo a, an ball pet zawngin a khu sut thei bawk. Manchester United-in hnehna chang zo lo mah se player inhliam an awm loh bakah chak lo zawk dinhmuna an din loh bawk avangin quarterfinal lut tura rinkai zawk an ni chhunzawm zel.

Engtin zel?

Inkhelh banah goal khungtu Mkhitaryan an kawm a, an zawhna hmasa ber pawh khelmual chungchang a ni. Armenian midfieder chuan, "Chak tumin kan theih ang tawka ṭhain kan khel a ni. Khelmual chungchang erawh team pahnih tana a ṭhat loh ve ve avangin ka sawi zui duh lo a, inkhel thlirtu chuan kan inkhel kha hmuhnawm an tih pawh ka ring lo," tiin a sawi.

Manchester United mana­ger Jose Mourinho chuan, "Khelmual awm dan aṭanga thlir chuan khel ṭha tak kan ni a, kha aia ṭhaa khelh kha chu a theih loh a ni ber a, ball inpe kual chunga khelh phei chu thil theih loh tawp a ni. Tihsual pakhat kan nei a, khami tih loah chuan kan khel ṭha a ni. Inhliam kan nei lo a, quarterfinal lut thei ve ve kan ni a, kan dinhmun erawh a ṭha hret," tiin an khelh danah a lungawi thu a sawi.

Europa League Last 16
First Leg Results
APOEL 0 - 1 Anderlecht
AND : Stanciu 29'
Rostov 1 - 1 Manchester United
ROS : Bukharov 53'
MAN : Mkhitaryan 35'
Copenhagen 2 - 1 Ajax
COP : Falk 1'; Cornelius 59'
AJA : Dolberg 32'
Celta de Vigo 2 - 1 Krasnodar
CEL : Wass 50'; Beauvue 90'
KRA : Claesson 56'
Schalke 04 1 - 1 Borussia M'gladbach
SCH : Burgstaller 25'
BOR : Hofmann 15'
Olympique Lyon 4 - 2 Roma
LYO : Diakhaby 8'; Tolisso 47'; Fekir 74';
Lacazette 90'
ROM : Mohamed Salah 20'; Fazio 33'
Olympiakos Piraeus 1 - 1 Besiktas
OLY : Cambiasso 36'
BES : Aboubakar 53'
Gent 2 - 5 Genk
GENT : Kalu 27'; Coulibaly 61'
GENK : Malinovskiy 21'; Colley 33';
Samatta 41'; Uronen 45'; Samatta 72'