La Liga inum boruak a sang

Spanish La Liga hmahruaitu chu Barcelona an ni a, an hnuai chiaha awm Real Madrid aia an sanna chu point khat chiah niin vawi khatin an khel tam zawk bawk. Sevilla chhiar hmaih an thiang bik lo a, Jorge Sampaoli naute hian pathumna dinhmun luah mekin Barca an phak lohna chu point li chauh a ni. Atletico Madrid tan champion sawi ngam chi a ni tawh lo a, mah se season thara Champions League khel turin palina chung lamah an insawhngheh zel a pawimawh.

Sevilla hian zanin dar 8:45-ah Leganes an mikhual ang a, Atletico Madrid hian dar 1:15-ah Granada an lenchilh thung ang. Pathianni zan dar 8:45-ah Barcelona chu Deportivo La Coruna khelmualah an lenglut ang a, Real Madrid-in zan dar 1:15-ah Real Betis an mikhual ang. Real tih loh zawngin league match 12 chiah inkhelh an hmabak tawh a, champion tum tan tawlhthluk a thiang tawh lo.

Goal khung thiam Barca

Barca-in Champions League last 16 first leg-ah Paris Saint Germain chu 4-0 ngawtin an ngam lo a, Barca leh coach Luis Enrique ten sawisel an tawk nasa hle - mahse, Barca ben harhna mai a lo ni! Barca coach Luis Enrique-a'n France-a an mualpho hnuah 3-4-3 formation hmangin a naute a remkhawm a, a tisual lo.An formation thar hnuaiah match nga khelin an chak vek a, goal 21 zet an khung - tih theih loha ngaih tiin PSG lakah meuh pawh inlehthalna ropui an thlentir a, 6-1 zetin an chak!

PSG an hneh hnu lawkah Barca thiampuipa Lionel Messi chuan, "Tumna, huaisenna leh duhna a awm chuan khawvelah hian theih loh engmah a awm lo," tiin a sawi a, Barca phur vanglai tak a ni. Catalan club tan hian Lionel Messi chuan tun season-ah match 38 khelin goal 39 a khung tling leh der tawh a, Luis Suarez-a'n match 38-ah goal 28 zet a khung tawh bawk. MSN zinga goal khung tlem ber Neymar-a'n a thiam ala theihnghilh lo tih pholangin match hnuhnung berah goal hnih a khung leh tawh bawk si a, Deportivo tan mikhual an chakawm loh tawp ang.

Real tan Morata?

Real Madrid-in table chung berah an hmahruaina sawhnghet hman viau mah se Valencia an hneh loh leh Las Palmas an inhnehtawkpui avangin Barca-in an tlanpel a, Pathianni zanah chetsual a thiang tawh lo. Hetihrual hian Real hi Champions League-a Napoli hnawt chhuak hlim ve tho an ni a, an phur vanglai tak a ni. Italy-a Napoli an hnehna inkhelah Alvaro Morata chu minute 77-ah tlan luhtir a ni chauh chungin goal a khung a, Spanish striker hi Zinedine Zidane-a'n Karim Benzema aiin ring tawh zawk se tia duhtu an tam tawh hle.

Kum 24-a upa striker hian tun season-ah minute 104 dana goal khung ziah ang a ni a, BBC tia hminglem an pek Karim Benzema, Gareth Bale leh Cristiano Ronaldo te aiin a minute zawnga chhut chuan goal a khung thei zawk. Ronaldo hian minute 114 dana goal khung ziah ang a nih laiin Benzema hi minute 149 dana khung ang a ni a, Bale-a'n minute 174 danah a khung thung. Morata hian tun season-ah goal 13 khung tawhin a nekchhuah hleihtheih loh Benzema aiin goal hnih chiahin a khung tlem a, minute 1000-in a khel tlem zawk bawk. Zaninah a inlan a nih phawt chuan Real Betis tan mangchhia a ni thei ang.

Chak loh thiang lo Atletico

Season ṭantirah Barcelona leh Real Madrid elpui ber thlan tur ni ta se Atletico Madrid an ni ngei ang. Mahse Diego Simeone-a nauten tawlhthluk an chin avangin nomawi beisei ngam chi an ni tawh lo a, Champions League khelhna 'chance' lehzel erawh bawhpelh an duh tawh bik lo ang - zaninah chak loh a thiang dawn lo. Atletico tan Fernando Torres chuan training zawm leh tawh mah se Spanish striker hi a inlan theih a la beiseiawm loh , tlarhmaah Antoine Griezmann leh Kévin Gameiro bawk innghahna an ni leh ang. Griezmann hian tun season-ah match 37 khelin goal 20 a khung tawh a, match 38-a goal 14 khungtu Gameiro pawh hi buaipui tham tur tak chu a ni - Granada tlarhnung tan hna a awlsam lo ang.