City tana khelh inring tawh lo Hart

England goalkeeper Joe Hart chuan Manchester City-ah chuan mamawh a nih tawh loh avangin a khelh leh a rin tawh loh thu a sawi. Kum 29-a upa goalkeeper hian August thlaa manager thar Pep Guardiola-a'n a chhuah theih thu a hrilh hnuah a ngheta chhuah aiin Italian club Torino chu loan-a zawm a thlang a, tunah erawh City-ah a kir leh a inring tawh lo.

Hart chuan, "Hnehna i chang dawn lo tih inhre sa chunga beih chu awmze nei lo mai a ni," tiin City-ah chuan theihtawp chhuah pawh ni se Pep a hmin zo dawn chuang lo niin a sawi a, Spanish manager hi a mimal tak erawhin a sawi chhe duh lo. English keeper chuan, "Pep hian ka nun tihchhiat hrim hrim nan he thutlukna hi a siam lo tih ka hria a, hlawhtlinna chhar a tumna kawngah a duh zawng ka ni lo ve mai a ni," tiin a thlir thiam hle.

Pep hian Hart hmunruak luah turin Claudio Bravo chu Barcelona aṭangin pound maktaduai 15.4-in a lalut a, mah se kum 33-a upa goalkeeper hian beisei a phak loh avangin sawisel a tawk nasa hle. January hnu lamah phei chuan Bravo hian kum 35-a upa goalkeeper Willy Caballero a awm bawk avangin hmun nghet a chang tawh bik lo. Hetichung hian Guardiola chuan Hart hmalam hun chu season tawpah chauh an ngaihtuah tur thu a sawi a, English keeper hi a chhuah hlen ngei rin a ni.

England tana vawi 68 inlan tawh goalkeeper chuan, "Premier League hi ka hrechiang em em a, mah se ka duhthlan hmasa ber erawh a ni hran lo. Ka duh ber chu an goalkeeper atana min duhtu club tana khelh hi a ni," a ti a, tuna a khelh mekna Torino president Urbano Cairo chuan Hart hi an hnena cham chhunzawm zel tura a duh thu a sawi tawh.