Chelsea hmaah Tottenham

Pathianni zan dar 10-ah Chelsea-in Stamford Bridge-ah Tottenham Hotpurs an mikhual dawn. Spurs manager Jose Mourinho hian Premier League-ah Chelsea vawi hnih a champion pui tawh a, league hmahruaitu an ni bawk.

Chelsea hian season ṭan hmain player lak nan pound maktaduai 200 chuang an hmang a, Frank Lampard-a'n Blues thar an din chho mek. London club pahnih inkhel hi hmahruaitu zawnna tih theih a ni a, en a châkawm hle.

Spurs hian Ningani zan khan Europa League-ah Ludogorets 4-0 in an sawp a; Carlos Vinicius-a'n goal hnih a khung bakah Harry Winks leh Lucas Moura ten goal khat ve ve an khung.

Mourinho hote hian a player khelhtir danah Chelsea nena an inkhel tur a ngai pawimawh tih a lang. A chhan chu a player pawimawh ṭhenkhat chawlhtirin Harry Kane leh Son Heung-min te an inlan lo.

Tottenham hian League Cup-ah Chelsea hi an pet tla tawh a, September 29 khan 1-1 a an inhnehtawk hnuin penalty-ah 5-4 in an chak. Chutihrualin Lampard-a hian Mourinho enkawl lakah vawi thum hnehna a chang tawh a, vawi khat chiah a la tlawm tih hriat a ṭha.

League Cup-a an intawn ṭum pawh hian mual sirah Lampard leh a pu hlui Mourinho te hi an inchhang thinrim a, manager pahnih hi chakna tur a nih phawt chuan ṭhian ṭhatna hi dah bo an pawi ti lo tih a lang.

Blues tlarhnung hi keeper Edouard Mendy leh defender Thiago Silva te an awm kawpin a phui ṭha a, Kane leh Son te hmaah fiahin an awm dawn. Tlarhmaah Timo Werner leh Hakim Ziyech te an awm a, inkhel boruak sangah eng ang chiaha ṭha nge an nih tih fiahin a awm ang.