Euro Champion 0 - 3 Copa Champion ; Argentina lakah Italy an mualpho

Lionel Messi awmna Argentina chuan kawng tinrenga inkhel thunun chungin Italy 3-0 in an sawp. Nilani zan inkhelah Copa America champion hian Euro champion hnehin Finalissima 2022 nomawi an chawi.

Lionel Scaloni enkawl Argentina tan Lautaro Martinez, Angel di Maria leh substitute Paulo Dybala ten goal khat ṭheuh an khung a, goal pahnih hi captain Messi siamsak niin, man of the match atan an thlang zui nghal.

Italian defender Giorgio Chiellini-a'n Azzurri tana a match hnuhnung ber a khel a, a hun hnuhnungah ropui taka chawlh duh mah se duhthusam ang erawh a thleng thei ta lo, an ram jersey erawh a mangṭha a ngai ta tho.

Khawmualpui pahnih champion inkhelh hi tun hmain vawi hnih an lo ti tawh. 1985 khan France-in Uruguay an hneh a, 1993 khan Argentina chuan Denmark an lo hneh tawh, tunah a vawi hnih nan an chak leh ta chiah.

Argentina nge nge
Nilaini zanlaia inkhel en turin Wembley Stadium-ah fans 87,112 an pungkhawm. La Albiceleste (Argentina sawina) hian a tir aṭangin inkhel an thunun a, an ṭhat theih dan bera khel an nih avangin inkhel an thunun kha a mak hran lo.

Tlarhmaa intlar Di Maria, Martinez leh Messi te chu Italian defender tan ven sen an ni lo. Messi-a'n amah vengtu Giovanni Di Lorenzo a vir khum a, box chhungah ball la lutin striker Martinez tan a siamsak, minute 28-naah goal hmasa ber an khung.

Copa America champion hian chawlhlawk hmain an khung belh, Inter Milan striker Martinez-a'n defender pahnih inkara ball a lirh luh la turin Di Maria a dawk chhuak a, keeper Gianluigi Donnarumma rawn tlan chhuak chu a 'chip' khum keuh.

Italy keeper Donnarumma hian Messi khung tur ṭha zetin vawi thum a dansak. Di Maria pawhin box sir aṭangin kum mawi takin a shot a, corner aṭanga ball kal chu leia a tlak hmain hlap pawp mah se Donnarumma hian a lo dang vek.

South America champion hi an tlarhma chauh an ṭha a ni lo, midfielder Rodrigo de Paul leh Giovani lo Celso ten an thlawp ṭha a, tlarhnung laia ding Cristian Romero leh Nicolas Otamendi te an rintlak bawk avangin an phu ang ngeiin hnehna an chang.

Italy an chuai
Hmanni lawk kha a la ni, hun rei a la ni lo - Wembley Stadium chhungah ngei hian Roberto Mancini enkawl Italy hian England hnehin European championship nomawi an chawi a, khawvelin Italian football a fak.

Mahse, hun rei lotê chhungin thil a danglam nasa ta hle. Azzurri la ni reng mah se Nations League-ah an chak lo a, anmahni aia team nem zawka ngaih North Macedonia an hneh loh avangin World Cup pawh an khel phak dawn lo.

Italian FA-in an manager Mancini chungah rinna an nghat ngam a, team thar din leh turin a lakah beiseina sang tak an nei. Senior player karah tawnhriat nei tlem Alessandro Bastoni leh Gianluca Scamacca te chu khelhna hmun a siamsak.

Amaherawhchu, chawlhlawk an hman meuh chuan a chak tur a chiang tawh. Tlarhma an hriam loin a hnung lam an pawp viau bawk - goal thum chauh an chhuah kha lawm tur an ni, indinthar leh turin eng chen nge an mamawh dawn tih chu sawi a harsa.

Buaipui tham Lionel Messi
A hmuna inkhel entu leh TV lam aṭanga lo thlirtute mit titlaitu chu Lionel Messi a ni. Argentina captain hian a thiamna chi hrang hrang hmangin Italian tlarhnung a chhaih buai - ven a harsatzia chu Giorgio Chiellini leh Leonardo Bonucci te zawh mai a fuh ang.

Kum 34 mi a ni tawh a, a vanglai a pel ve tawh. Messi hian Paris Saint-Germain tan season a hman ṭhat tawk loh avangin a chuai ta nia ngaitu pawh an tam, mahse ram tan duhtawka a inkhel lai hmutute erawhin player hlauhawm bik a nihna an la hmu.

Argentina tan nomawi a chawi dawn lo emawni tih hnuah Copa America an champion a, tunah chuan European champion hnehin Finalissima an la, an hmabak chu kum tawpa khelh tur Qatar World Cup a ni dawn.
La Albiceleste captain Messi chuan, "Italy kha team ṭha tak an ni a, chuvangin kan tan chuan fiahna ṭha tak a ni. Stadium chhungah Argentine mi an tam em em a, anni nena hlawhtlinna chan hi chu a nuam," tiin a sawi.

Scaloni-a naute hian June, 2019 hnu lamah tlawm an la nei lo, hneh loh tawng loin match 32 an kaltluang tawh. Team inkhairual lo tak ni ṭhin kha tunah chuan an inkhairual chho ta viau, player rinrawl zingah hliam an awm a nih loh chuan World Cup-ah pawh beiseina an nei sang dawn.

Italy coach Mancini chuan, "Striker ṭha bik an nei a, midfielder leh defender pawh an ṭha. Dan ngaihna awm lo khawpin an khel ṭha," tiin an hneh loh Argentina a dah sang thiam hle, inkhel entu chuan a thusawi hi an ṭawmpui ang.