Team thar Hotshots an chak

Mizoram Super League (MSL) season 7 an khel ṭan a, match hmasa berah team thar Mission Veng Hotshots chuan Chanmari Vikings lakah 98-72 in hnehna an chang nghal - an beisei ang ngeiin tournament bul an ṭan fuh.

Zonunsanga'n MSL 7 atan point hmasa ber a nei, 2 points hmangin inelna a hawng. Isle-a hi 3 points nei hmasa ber a ni bawk, match hmasa bera point nei hnuhnung ber erawh Eddie Zaithanmawia a ni thung.

Isle leh Eddie te chet inkarlakah hian Hotshots tan Arshdeep Singh a inlar, Punjab forward hian a pumpuiah point 22 neiin team tana thawhhlawk ber a ni - Aizawl a lo thlen tukah tournament khel nghal ni mah se a mikhual lo hle.

Nilaini zan R. Dengṭhuama Indoor Stadium, Mualpuia inkhelah Hotshots lamin bul ṭan fuh mah se, quarter khatna a zawh chuan Vikings lamin 23-19 in hma an hruai hman - Mizo hlanga khel team hian beiseina pawh an nei sang chho viau.

Hun pawimawh laiah Moses Zoremmawia'n point a nei zauh zauh a, point nei hnem ber erawh Michael F. Lalawmpuia (22 points) a ni. Moses-a (13 points) leh Vanchuangpuia (14 points) hmangin an dinhmun pawh a ṭha hman hle.

Hun tawp nana minute hnih pawh a awm tlin tawh lohah team pahnih hi 70-70 in an inhnehtawk, hun pawimawh laiah Khatla TBL tan pawha khel tawh Eddie-a'n a zawnin basket a rawn nei a, hun tawp a hnaih zui avangin Mission Veng an chak.

Hotshots assistant coach David Lalruatfela chuan, "Inelna lian boruak sangah tawnhriat kan neih tlem a lang a, kan chiai lek lek. Mahse, a tawpah erawh a vannei zawk kan ni," tiin Vanglaini a hrilh.

Player a nih laia Zarkawt BCA captain Dave hian inkhelh hmain chak an tum ngam tur thu a sawi lawk a, a thusawi ang ngeiin chak tumin a nauten an bei. An match hnihna atan June 4, Inrinni zanah Tuikual South nen an inhmachhawn leh ang.

Chak lo Vikings hian an match lehpekah chuan champion lai Zarkawt BCA an tum ang. BCA nen an inkhelh hunah chuan inelna hnuhnung bera an hman thiam leh an thiampuipa ni bawk Raymond Edward Miller Jr an chhawr theih tawh a rinawm.