Semifinal-ah Marin leh Ruud an lut

French Open mipa semifinal khel tur a hriat kim. Zanin dar 6:15 hian Paris khawpuiah Roland Garros semifinal hi khelh a ni dawn a, match hmasa zawkah Marin Cilic leh Casper Ruud te an inhmachhawn ang.

Nilaini zan quarterfinal inkhelah Cilic hian seeded pasarihna Andrey Rublev chu 5-7, 6-3, 6-4, 3-6, 7-6 (10-2) in a hneh. Croatian tlangval hian hnehna chang turin aces vawi 33 a vaw chhuak a, winners pawh ṭum 88 ngawt a nei.

Cilic-a hun
French Open semifinal a luh takah chuan Cilic-a'n record a siam, tuna player la inkhel mek (active) zingah Grand Slam palia semifinal lut vek thei pangana a ni, clay court season a hman ṭhat ber ṭum a nih bawk avangin champion a tum ngam ang.

Novak Djokovic, Rafael Nadal, Roger Federer leh Andy Murray te chuan Cilic a thlen ang hi tun hmain an lo thleng tawh. Cilic chuan, "Ka tan chuan mellung pawimawh a ni, player ropui kianga ka hming a inziak ve hi ka lawm," a ti.

US Open champion hlui Cilic hian tun hmain French Open-ah result a nei ṭha ngai teh vak lo. Kuminah pawh rinkai a ni phak chiah lo, mahse tournament a khelh chhoh chinah erawh player hmuhnawm leh hlauhawm berte zinga mi a ni phak.

Kum 33 mi Cilic chuan, "Ka tan ni ṭha a ni, ka khingpui Andrey pawhin a khel ṭha takzet. Inhnehtawk taka chak tur chuan vanneih a ngai, vanneihna chu ka lamah a ṭang hlauh," tiin a ṭawng uang duh lo.

Ruud a tlang
Quarterfinal inkhel pakhat zawkah Casper Ruud pawh a chak. Seeded pariatna Ruud hian Holger Rune chu 6-1, 4-6, 7-6 (7-2), 6-3 in a hneh a, Roland Garros a khelh tawh china a thlen san ber ṭum a tawng.

Kum 19 mi Rune-a'n French Open a khelh hmasak berah beisei aiin a khel ṭha a, quarterfinal hial a thleng. Mahse, Norway tlangval lakah game hmasa panga a hloh nghal vek, a hnu lamah insiamṭha ve deuh mah se tawnhriat a neih tlemna a lang a, a ṭang tlang zo lo.

Hnehna changtu Ruud chuan, "Norway tan chuan ni duhawm a ni, kei ka chak bakah Ulrikke Eikeri chuan mixed doubles huangah final a lut bawk, kan ram tan chuan lawmna tur a ni. Marin ka hmachhawn hunah pawh a ṭha thei ang bera khelh ka tum ang," a ti.

Kum 2020 aṭanga chhutin Ruud hian clay court bikah match 64 hnehna a chang tawh, ani aia chak hnem an awm lo. Final pawh vawi riat lutin ṭum sarih chu title a la, kumin French Open-ah pawh hmachhawn châkawm lo tak a ni phak.

Semifinal Fixtures
Casper Ruud vs Marin Cilic
Rafael Nadal vs Alexander Zverev
Note: Match hmasa zawk hi zan dar 6:15-ah an khel ang, an zawh hnuah a hmun ngaiah match hnihna an khel ang.