En châkawm Khatla TBL Vs Zarkawt BCA

Mizoram basketball sawi tawh chuan Khatla TBL leh Zarkawt BCA te hming sawi hmaih theih a ni lo a, Mizoram Super League awm hnuah phei chuan record an nei ṭha dun hle. Basketball club ṭha pahnih hi zanin dar 8:00 hian R. Dengṭhuama Hall, Mualpuiah an inkhel dawn a, basketball ngaina tan chuan hmaih a thiang lo.

MSL hnuhnung ber kha Covid-19 vangin a buai a, hri leng karah nikum khan an khel zo hram. Zarkawt BCA chuan MSL6 final-ah Khatla TBL an hneh a, a lungthu kim nan an champion. Chutihrualin Khatla TBL erawh engtiklai mahin dah hniam theih a ni lo - state pawn player pahnih Levi Bradley Jr. leh Arvindar Singh te an chah thleng tawh.

Bung Thar
MSL hmasa berah Khatla TBL-in H. Laldinsanga (Mapuia) hoin nomawi an chawi a, India international hlui Mapuia hi MVP atan an thlang. TBL hian MSL ṭan hma aṭangin Mizo player ṭha an hui khawm a, player theihna nei sang an kawl hnem viau avangin season tinin team ṭha zinga mi an ni.

Mahse, Mapuia'n a ho thei reng lo a, player ṭha rual Vanlalmuana, Gospel Lalthawmmawia (Gosa) leh Nelson Lalrohlua te hun a liam. Captain hlui Vanlalnunsanga (Lana) hoin team thar din an tum a, TBL bung thar chu a inṭan ta.

Khatla TBL coach Lana chuan, "TBL hi team thar kan ni a, bung thar kai tumin hma kan la mek. Season Opening final-ah khan ka tihsual vangin final-ah Zarkawt BCA kan hneh lo a, tun ṭumah erawh a danglam tawh ka beisei," tiin Vanglaini a hrilh.

Lana chuan sawi chhunzawmin, "Team ti chak turin Levi Bradley Jr. leh Arvindar Singh te kan la. Tun hma angin hming langsar lalut lo mah ila, team ṭhatna tur zawk a ni. India international player kan lalut tawh a, neuh neuh an ngah. Miami aṭanga kan lak Levi phei hi chu a danglam hlak," tiin an foreign player ṭhat thu a sawi.

Champion tum BCA
Zarkawt BCA hi MSL4 aṭangin an la champion char char a, inelna hnuhnung pathuma MVP Lalrina Renthlei phei chuan Mission Veng Vikings tana nomawi a chawi nen vawi li a champion tawh.

BCA coach Lalruatfela (Afela) chuan, "Ṭum dang ang thoin theihtawp kan chhuah leh dawn a, player-te zingah inthlahdah an awm lo. Champion duhin an tuihal a, nomawi dawm hi an kham thei lo. Chu chu kan ṭhatpui hle," tiin champion an tum thu a sawi.

MSL champion lai team hian champion nawn an tum a ni tih nemngheh nan squad ṭha tak an nei a, NorthEast champion Mizoram team-ah player pali Zonunsanga, Matthew Remtluanga Sailo, Lalrina Renthlei leh R. Lalfakawma te an kawl bakah United States-a basketball khelh paha lehkha zir Lalhnehpuia Chhakchhuak (Nanaua) an chhawr thei dawn.

Hmuhnawm chu
Zarkawt rawlthar Nanaua ringawt hi en tham a tling a, United States-a baskebtall a zir hnuah eng ang hmasawnna nge neih a hriat châkawm. Nanaua hi BCA inkawp nghet sa Zonuna, Pupua leh Lalrina te nen engtin nge an inkawp ang tih hriat a châkawm bawk.

BCA hian Mizo player an neih ṭhat bakah Miami aṭangin Joseph Fredrick Allen an lalut a, hmuhnawm thamin an khel thei ang. Afela chuan, "Nanaua hi a defensive a ṭha khawp mai. Tunah hian state pawn player pakhat chauh nei mah ila, Pupua kan kawl - ani hi state pawn player nen an intluk," tiin a sawi a, India aiawha khel pha Lalrina an la kawl cheu.

Khatla TBL lam pawhin India team-a training mek Vanlalṭhazuala an chhawr thei dawn lo a, mahse K. Lalthianghlima ringawt pawh hmuhnawm a tling ang.

April thlaa neih zawh Inter Veng Under 21-ah khan Thianga hian Mission Veng a champion pui a, an veng mipui a lamtir. He inelnaah hian Thianga hian 243 point zet a score a, MVP an thlang - MSL-ah fiahin a awm dawn.

Hriat tel atana ṭha chu tun ṭum MSL-a international player-te hi kut vei lam hmang an ni deuh vek a, zanin inlan tur Levi (TBL) leh Joseph (BCA) te pawh hi kut vei lam hmang an ni. International player pahnih hian hmuhnawm an lantir thei ang.

Zanin Inkhel Tur
Khatla TBL 8:00 PM Zarkawt BCA

June 4, Inrinni
MSV Hotshots 8:00 PM Tuikual South

June 7, Thawhlehni
Zarkawt BCA 8:00 PM MSV Hotshots

June 8, Nilaini
Chawnpui 8:00 PM Khatla TBL