PFA awards ; Asia fapa rangkachak Son a tel lo!

Penalty vawi khat pawh pet loin top scorer a ni thei a, mahse, Tottenham Hotspur forward Son Heung-min tan Professional Footballers' Association men's players' player of the year chawimawina dawng turin hmun a awm ve lo!

Mak i ti mai thei - mahse, he thu hi a tak ngei a ni a, i chhiar dik. Spurs-in Champions League an khelh theih nana thawhhlawk tak Son hi PFA players' player of the year pawh ni se tuman an thik lo ang, tih tur a nih laiin player chhawpchhuah paruk zingah pawh a lang phak lo a, 'a mak' tih chu hrilhfiah dan awlsam ber a ni.

PFA players' player of the year award dawng thei tura chhawpchhuah zingah Liverpool player an tam ber a, player pathum - Sadio Mane, Mohamed Salah leh Virgil van Dijk te hming a lang.

Manchester City thiampuipa Kevin de Bruyne hming a lang a, mak taka Harry Kane hming a lan bakah Manchester United forward Cristiano Ronaldo hming a lang nawlh bawk.

Sorry Son!
South Korean forward Son Heung-min hian season hman zawh takah khan Spurs tan league match 35 khelin goal 23 a khung a, assist vawi kua a nei bawk - penalty a pet miah lo.

Kum 29 mi forward hi Liverpool striker Mohamed Salah nen an goal khung zat a inang a, Premier League top scorer an ni dun - Spurs-in top four dinhmun an luah theih nan a thawhhlawk hle bawk.

Mahse, thilmak a thleng - Son aia season hmang chhe zawk Harry Kane chu player ṭha thlan tur zingah a tel a, kum 28 mi striker hian season hman zawh takah khan Spurs tan league match 37 khelin goal 17 a khung a, assist vawi kua a nei.

Kane-a'n league goal 17 a khung zinga goal li chu penalty aṭanga a chhuih luh a ni a, Son hian top scorer ni tura a elpui dangte angin penalty pet ve ngat se goal 30 dawn a khung dawn tihna a ni.

Liverpool = 3
Champions League team of the season-ah Liverpool player pali an lang a, PFA players' player of the year ni thei zingah player pathum an thawh leh ta - Salah chu a langsar ber a ni.

Kum 29 mi Salah hian league match 35 a khelhah goal 23 a khung a, assist vawi 14 a nei bawk. Premier League top scorer a nih bakah assist ngah ber a ni tel a, Football Writers' Association footballer of the year leh PFA Fans player of the year award a dawng tawh bawk.

Liverpool chhuahsan tur anga sawi Sadio Mané pawh thlan tur zingah a lang a, kum 30 mi forward hian league match 34-ah goal 16 a khung a, assist vawi li a nei bawk - Reds goal nawr kawnga player thawhhlawk a ni.

Hliam vanga Virgil van Dijk a chawlh laia Liverpool talbuaizia chu a hretute vek kan ni - ngai a awh leh pawh tam takin an rin loh defender hian tun season-ah league match 34 khelin goal vawi thum a a khung a, assist vawi li a nei a, league-a goal 26 chiah an chhuah theih nana player thawhhlawk a ni.

KDB & CR7
Liverpool nena champion inchuh boruak sang tak karah Kevin de Bruyne chu Manchester City tana danglamna thlentu a ni ṭhin a, Premier League player of the season ni lai hian PFA players' player of the year award hum haw pawh ni se a mak lo ang.

KDB hian tun season-a league match 30 a khelhah goal 15 a khung a, assist vawi riat a nei. City player zingah tun season-a ani aia goal khung hnem leh assist ngah zawk an awm lo.

Ballon d'Or vawi ruk dawng tawh Ronaldo a lang nawlh a, Manchester United striker hian league match 30-ah goal 18 khungin assist vawi thum a nei a, Red Devils tan a thawhhlawk.

Mahse, Portuguese forward hian Manchester United chu table-ah parukna bak a nihpui thei lo a, top four chu point 13 ngawtin an phak lo - an season a ropui lo hle.

Naupang rual
Professional Footballers' Association men's young player of the year award dawng thei turin player paruk hming chhawp a ni bawk a, City tana league match 28-a goal kua leh assist vawi nga neitu forward Phil Foden chu player langsar a ni.

Arsenal tana season duhawm hmangtu Bukayo Saka leh Emile Smith Rowe hming a lang bawk - Saka hian league match 38 khel vekin gaol 11 a khung a, assist vawi sarih a nei. Saka khelhpui Smith Rowe hian match 33-ah goal 10 khungin assist vawi hnih a nei thung.

Crystal Palace-ah loan-in Chelsea midfielder Conor Gallagher a khel a, match 34-ah goal riat leh assist vawi thum a nei a, England tana inlan turin koh a nih phah hial a, PFA young player award dawng thei zinga awm a phu hle.

Chelsea right back Reece James-a'n match 26-ah goal nga khungin assist vawi kua a nei a, a unaunu Lauren James chu women's young player award dawng thei turin a awm bawk. Steven Gerarrd-a hnuaia nasa taka hmasawn Jacob Ramsey pawh thlan theih zingah a lang a, Aston Villa midfielder hian match 34-ah goal ruk leh assist vawi khat a nei.