FIFA World Cup playoff ; Ukraine tan pen khat a la ngai
An rama an thawm hriat chu silai kap ri, bomb puak ri leh thlabara nunau ṭap ri te a ni - indonain an ram a tuam a, Ukraine mipuiten hlauthawnga hun an hmang chhung hi ava rei ta em!
Mahse, chutiang boruak karah chuan khawvel hmun hrang hranga Ukrainian-te tan football chuan beiseina a siamsak a, "Aw football, i hming chu beiseina maw lo ni a!" kan ti leh ta a nih hi.
Nilaini zan khan Ukraine chuan World Cup playoff semifinal-ah 3-1 in Scotland an hneh a, kum tawp lama World Cup khel turin vawi khat chak chiah an mamawh ta.
June 5, Pathianni zan dar 9:30-ah World Cup playoff final khelh a ni dawn a, Ukraine hian Gareth Bale-a ram Wales nen World Cup khelh an inchuh dawn.
Hei le, Ukraine
Hampden Park-a Ukraine leh Scotland intawn hma hauhin boruak a rip a, team pahnih intawn hmaa Oleksandr Zinchenko-a'n mittui nena media a hmachhawnte chuan Ukraine dinhmun chiang takin a hrilhfiah.
Ukraine hnam hla sak laia player-te hmelah chuan an ram natna hmuh theihin a awm a, he team hian hun harsa karah an ram mipuite tan hlimna thlen an duh tih a lang.
Ukrainian hnam hlaah chuan, "Ukraine ropuina leh zalenna chu tukdawlin a la awm lo, Ukrainian unaute u, vanneihna chuan hlimin min chhawn leh ang, ni êng hmaa dai a thamral angin kan hmelmate chu an boral ang a, hlim takin kan ramah hian kan cheng ang," tih a awm.
Chutiang hlathuin Hampden Park a luah lai chuan fans tam tak biangah mittui a luang a, mahse, an hnam hla ang ngeiin vanneihna chuan Ukraine lam a ṭang a, hlim nui hmel nen a lo chhawn!
A goal
Minute 33-naah mualneitu fan-te ngawihtirin Andriy Yarmolenko chuan goal hmahruai a khung a, Atalanta midfielder Ruslan Malinovskyi ball pek uma a tlan dan kha i lo hmu em? Khatiang ema chak leh inpekna nen khan Yarmolenko a la tlan ngai lo.
Kum 32 mi striker hian an ram mipuite tan hlimna thlen ngei a duh a ni tih a lang a, Ukrainian player-ten an theihna zawng zawng an hlan. Yarmolenko hian Scotland 'high line' chu tlanpelin Scottish keeper tawnhriat nei ṭha Craig Gordon a pet khum leh a, Scotland an hawihai.
First half-ah goal dang a lut lo a, second half-a goal hnihna khung turin nghah rei erawh a ngai lo. Ṭan aṭanga minute lina lekah Roman Yaremchuk chuan Oleksandr Karavaev aṭanga a ball hmuh chu a khung ve leh a, chak tur a chiang ṭan.
Mahse, Scotland an beidawng duh bik lo. Hun tawp nan minute 11 chauh a awm tawh tihah Callum McGregor chuan si phurh a rawn sut ṭhen a, thawm chu ṭha tak a ni.
A thlawn mai maw
Scotland-in goal an khung hnuah beiseina an nei thar a, theihtawp chhuahin Ukraine an nawr - mahse, vanneihnain Ukraine lam a ṭang a, Scotland-in an nawr luatah an tlarhnung a pawp tel.
Hun pek belh minute nganaah Artem Dovbyk chuan Zinchenko siamsak chu goal-ah a chantir a, hun a tawp zui - Scotland beiseina chu tihtawpin a awm a, Ukraine tan beiseina a vul thar ve leh ta.
Ukraine tan Scotland hneh ngawt erawh a tawk lo - match khat khelh tur an la nei a, Qatar-a World Cup khel turin Wales an la hmachhawn ve leh phawt a ngai dawn a, a awlsam lo ang.
UEFA-in World Cup-ah hmun 13 an chang a, team 12 an tling tawh - hmun ruak pakhat a la awm a, he hmun ruak pakhat hi Wales leh Ukraine inkhela chak zawkin an hnawh khat ang. Chinfel a ni thuai dawn e.
Tute nge?
UEFA hnuaia ram zingah Germany, Denmark, France, Belgium, Croatia, Spain, Serbia, England, Switzerland leh Netherlands chu qualifier-ah an group hmahruaitu an nih avangin World Cup khel turin an tling.
Group tina pahnihnate chu playoff khel turin an tling leh a, pahnihna zinga a ti ṭha zual paruk chu seeded an ni a, Nations League aṭangin team pahnih chu playoff khel tur hian an tling bawk.
Single leg hmangin result chinfel a ni a, seeded ho hian anmahni mualah zel an khel. Path A, B & C-ah team ho ṭhen an ni a, group khatah team pali zel an awm.
Team palite hian semifinal hmangin final lut tur an zawng a, a tawpah final-a chak zawk an tling - Path B aṭangin Sweden 2-0 a hnehtu Poland, Path C aṭangin North Macedonia 2-0 a ngamtu Portugal te an tling tawh a, Path A aṭangin Wales leh Ukraine ten an inchuh ve leh dawn e.
UEFA - World Cup Playoff
March 29, Thawhlehni Zan
Portugal 2 - 0 North Macedonia
POR: Bruno Fernandes 32', 65'
Poland 2 - 0 Sweden
POL: Robert Lewandowski 49' (P); Piotr Zielinski 72'
June 1, Nilaini Zan
Scotland 1 - 3 Ukraine
SCO: Callum McGregor 79'
UKR: Andriy Yarmolenko 33'; Roman Yaremchuk 49'; Artem Dovbyk 90+5'
June 5, Pathianni Zan
Wales 9:30 PM Ukraine