July 3-ah Community Shield

Football Association (FA) Community Shield chu July 30, Inrinni zan dar 9:30-ah Leicester City khelmual King Power Stadium-ah an khel dawn. Premier League season khuhhawnna inkhel anga ngaih hi Manchester City leh Liverpool ten an khel ang.

Inelna hi a vawi 100-na tur a ni dawn a, league champion Man City leh FA Cup champion Reds inkhel tur hian ngaihven a hlawh ang. Season liamta khan team pahnih hian English football an thunun a ni.

A tlangpui thuin Community Shield hi Wembley Stadium-ah khelh a ni ṭhin, kumin atan erawh UEFA Women’s Euro 2022 final khelh hun tur nen a inrual a, stadium hrana an khelh a ṭul phah.

Season hmasa khan FA Cup champion Foxes chuan Manchester City 1-0 a hnehin Community Shield hi an la.

Ṭum dangah chuan Community Shield hi August-ah khelh a ni ṭhin a, mahse, kuminah hian kum tawp lama World Cup khelh a ngaih avangin season an ṭan hma dawn.

Premier League chu Community Shield khelh zawh a nih hnu lawk, August 6-ah khelh ṭan a ni dawn a, November 12 & 13-a match khelh zawhah World Cup avangin an chawl ang.

World Cup final khelh aṭanga ni riatna, December 26-ah Premier League hi khelh chhunzawm leh tur a ni - Qatar thlen tur World Cup hi November 21-ah ṭan a ni ang a, December 18-ah final khelh a ni dawn a ni.

Premier League, 2022-23 season fixture hi June 16-ah tlangzarh a ni ang.