Den Haag manager thar Kuyt

Dutch club ADO Den Haag chuan nimin khan manager atan Liverpool star hlui Dirk Kuyt an lakluh thu an puang. Den Haag hi Dutch football second division Eerste Divisie-ah an awm mek.

Dirk Kuyt chuan, "Den Haag ka enkawl thei tur hi ka lawm a, chona thar hmachhawn turin ka inpeih," tiin a sawi. Kum 41 mi Kuyt hi Quick Boys aṭanga bul ṭan niin Quick Boys-ah bawk a hun tawp a hmang.

Kuyt hian Utrecht chu Dutch Cup-ah champion puiin hriat a hlawh ṭan a, Feyenoord-ah hming a chher lehzual. Feyenoord aṭangin Liverpool-ah kalin League Cup-ah a champion pui bakah Champions League-ah pahnihna an ni.

Dutch winger hi Fenerbahce-ah kalin Super Lig, Turkish Cup leh Turkish Super Cup-ah a champion pui vek. Hemi hnu hian Feyenoord-ah let lehin Eredivisie leh Dutch Cup-ah a champion pui.

Kuyt hian Netherlands tan pawh match 104 khelin goal 24 a khung a, World Cup 2010 leh 2014-ah pahnihna leh pathumna a nihpui a ni.