Man United an inṭhuah fai

Paul Pogba, Juan Mata leh Jesse Lingard ten Manchester United tana an conatrct an hmang zo. Player pathum hian Old Trafford an chhuahsan dawn tih Red Devils chuan an sawi chiang.

France midfielder Pogba hian 2016 khan Juventus atangin Man United hi a zawm, pound maktaduai 89 man niin a hunlaia khawvel player manto ber a ni, theihna sang tak nei mah se an lakluh dawna an beisei ang erawh a phak lo.

Kum 2009 khan a vawi khat nan Pogba-a'n Man United hi a zawm, a contract hmang zoin 2012 July thla khan Juventus a zawm, Turin club tan hlawhtlinna hrang hrang a chang, sum tam tak sengin English club-in an lalet.

A man atan sum hmang hnem viau mah se, tunah a vawi hnih nan a chhuak dawn - free transfer ve ve a nih avangin Man United tan sumdawnna zawnga chhut chuan Pogba chungchangah hian an che ṭha lo.

Old Trafford a zawm leh hnua a season hmasaah League Cup a chawi a, Europa League-ah an champion zui bawk. A hnu lamah erawh Man United hian hlawhtlinna an chang thei ta lo, match 233 aṭanga goal 39 khungin a hun a hmang zo ta a ni.

Man United academy-a Pogba awmpui Jesse Lingard pawh a chhuak dawn. England midfielder hian Man United-ah khelhna hmun nghet a chang lo, season hmasa khan West Ham tan loan hmangin hlawhtling takin a khel - rama tana inlan tur pawhin kohna a dawng leh hman hial.

Inkhelh tam a duh avangin Lingard-a'n a khelh phakna club zawm a duh. Mahse, club lamin a chhuah an phal lo, manager lailawk Ralf Rangnick-a'n chhawr a tum bawk. Amaherawhchu, a duh beisei ang erawh a hmu leh ta chuang lo.

Man United aṭanga inzir chhuak a ni a, a hun hnuhnungah pawh a phu ang tawk zahna leh chawimawina erawh a dawng lo. Old Trafford-a an match hnuhnung berah pawh luhtir a ni lo, hei vang hian a unaupa pawh a lo ṭawng chhuak tawh.

Nilaini zanah Pogba leh Lingard chhuah tur thu a chiang a, nimin tlai khan Mata chhuah tur thu pawh club lamin an nemnghet. Spanish midfielder hian coaching team zawm ai chuan inkhelh chhunzawm a la tum.

Kum 34 mi Mata hian United tan FA Cup, Community Shield, League Cup leh Europa League te a chawi. Inelna hrang hrangah match 285 khelin goal 51 a khungsak a, season thara a pan tur erawh tih chian a la ni lo thung.

Manager thar Erik Ten Hag kaihkhruaina hnuaia khel tur Man United chuan an midfielder pathum hi an thlah a, club tana an hnathawh leh thil tih tawh zawng zawngte avangin lawmthu an sawi. Pogba, Lingard leh Mata bakah hian Edinson Cavani leh Nemanja Matic te chhuah tur thu an sawi tawh bawk a, hming langsar panga ngawtin Old Trafford an chhuahsan dawn.