Belgium hmaah Van Gaal-a hote fiahna

Zanin dar 12:15 hian Belgium-in King Baudouin Stadium, Brussels-ah Netherlands an mikhual dawn. Louis van Gaal hnuaiah Oranje hi an insiamṭha a, World Cup khel turin tling mah se fiahna tak tak an hmachhawn lo - Red Devils lakah fiahna an hmachhawn ang.

Nations League-ah hian Belgium leh Netherlands awmna group-ah Poland leh Wales an awm. Nilaini zan khan Poland hian Wales hi 2-1 in lehthal a, Robert Lewandowski telna team hi group hmahruaitu an ni mek.

Van Gaal naute
Football manager zinga sulhnu ṭha ber zinga Van Gaal hian kum 2016 khan Manchester United chu FA Cup-ah a champion pui a, a ban zui avangin football team enkawl hna a chawlhsan.

Nikum August thla khan Netherlands chuan Van Gaal hi an ko kir a, Dutch manager chuan an ram team enkawl tura amah aia ṭha an awm loh thu a sawi.

Van Gaal hian a thusawi ang ngeiin Oranje hi result ṭha a neihpui a, match kua an inkhelh tawhah chak loh an la nei lo. Netherlands hi World Cup khel turin an tling a, an match hnuhnung berah Germany nen an inhnehtawk bawk.

Fiahna chu
Netherlands hian tlarhnung ṭha tak an nei. Liverpool rinrawl Virgil van Dijk, Manchester City defender Nathan Ake leh Juventus defender Matthijs de Ligt te an kawl.

Midfield-ah Barca midfielder Frenkie de Jong-a'n a ho thei a, tlarhmaah Memphis Depay te an kawl bawk. Chutihrualin Oranje aiin Belgium player-te an langsar zawk.

Oranje tan Premier League-a Manchester City champion puitu Kevin de Bruyne ringawt pawh ven tham a tling dawn. Romelu Lukaku-a'n tun season-ah beisei pha lo mah se Inter Milan champion pui theitu a ni tih theihnghilh loh a ṭha.

Amaherawhchu Red Devils hian UCL-a Real champion puitu keeper Thibaut Courtois an chhawr thei lo. Hoffenheim keeper hlui Koen Casteels-a'n hmunruak zau tak hi hnawhkhah a tum ang.

League A
Group A1 : France, Denmark, Croatia & Austria
Group A2 : Spain, Portugal, Switzerland & Czech Republic
Group A3 : Italy, Germany, England & Hungary
Group A4 : Belgium, Netherlands, Poland & Wales

June 1, Nilaini
Poland 2 - 1 Wales
POL : Jakub Kaminski 72'; Karol Swiderski 85'
WAL : Jonny Williams 52'

Nizan Inkhel (Result kan hre hman lo)
Czech Republic 12:15 AM Switzerland
Spain 12:15 AM Portugal

Zanin Inkhel Tur
Croatia 12:15 AM Austria
France 12:15 AM Denmark
Belgium 12:15 AM Netherlands

June 4, Inrinni zan
Hungary 9:30 PM England
Italy 12:15 AM Germany