Aizawl FC leh Mohun Bagan-in point hnih hloh

Ludhiana-ah Aizawl FC-in Mahmoud Al Amna leh Bayi Kamo Stephane te hmanga goal hniha an hma hruaina an hum zo lo a, Minerva Punjab lakah point hnih an hloh.

Inrinni zan inkhel dangah Mohun Bagan goal khung pawm sak an ni lo a, Kanteerava Stadium-ah champion lai Bengaluru FC nen goal awm loin an inhnehtawk.

I League table-ah Aizawl FC-in point 30 hmuin hma an hruai zel a, nizana Chennai khawpuia inkhelah East Bengal-in mualneitu Chennai City an hneh a nih chuan Mizo club nen an point hmuh zat a inang ang a, hmahruaitu erawh head to head-a ṭha zawk Mizo club an ni ang. Pathumnaa awm Mohun Bagan-in match hniha khel tlemin point 23 an hmu tawh bawk.

Amna leh Kamo
Guru Nanak Stadium-ah Minerva Punjab tan an foreigner an langsar nghal a, Nigerian midfielder Victor Amobi-a'n chance hmasa ber goal zawnah a pet lo. Mualneitu lamin chance nei chhunzawmin corner kick aṭanga ball kal chu captain Kareem Omolaja Nurain-a'n goal-ah a tauh a, hemi per hi South Korean defender Sang Min Kim-a'n goal zawnah pet leh mah se goalline aṭangin Lalṭhakima'n a pet chhuak.

AFC defender Lalramchullova ball keng rei lutuk chhuh­saktu David KC Ngaihte cross chu Baoringdao Bodo-a'n tauh fuh mah se keeper Albino Gomes-a'n ṭha takin a dang.

Natural grass-ah Mizo club-in harsatna an tawk a, ground ṭhat tawk loh vangin an tawlh thlu ngun bawk. First half tawp lamah Aizawl FC-in awmze neiin an khel thei chauh a, minute 45-naah Amna leh Jayesh Rane ten one-two mawi tak hmangin Punjab tlarhnung an ṭhiat a, Syrian midfielder hian a volley goal.

Second half-ah Aizawl FC-in table hmahruaitu an nihna chu khelmualah an lantir thei ṭan a, minute 56-naa Rane corner pet chu Ṭhakima'n tauh fuhin Ivorian forward Kamo-a'n a su goal. Mizo club ṭawiawmtu Mizo an ṭhahnem a, goal luh pawh hian thawm a ṭha tham hle.

Kingsley tel lohna
Aizawl FC-in match 13 an khelh tawh­ah central defender Eze Kingsley a inlan thei vek a, Nigerian defender hi vawi li yellow card a hmuh tawh avangin Minerva a hmachhawn ve thei lo.

Minute 61-naah halfway line pelh hret aṭanga Moinuddin Khan ball vawrh luh chu defence leh keeper inkarah tla fuhin Loveday Okechukwu-a'n a tlawh goal, Nigerian defender hi RG Stadium-a an lama tiluttu kha a ni.

Hemi hnu hian Minerva keeper Arnab Das Sarma ball clear sual nang fuhtu Rane-a'n goal ruakah a khung thei lo.

Aizawl FC-in an fimkhur tawk loh rah an seng a, box pawna Rane freekick chawi chu Minerva captain Kareem-a'n goal kilah a dah a, 2-2 a ni. Kareem hi defender ni mah se midfield hna chelhtir a ni a, AFC tan buaina tham a tling. Minerva hian Chullova handball vangin box pawnah chiah freekick an hmu nawn a, captain Kareem-a'n chakna goal khung nan a hmang ṭangkai thei lo.

Mizo club-in Eze Kingsley awm loh an tuar a, chutihrualin Nigerian defender hi hrem a nih dawn rau rau chuan Minerva nena hrem a tawk hi Khalid Jamil-a tana lawmna tur a ni.

Punjab club hian talent nei ṭha player nei ngah mah se goal khungah harsastna an nei a, anni aia khung tlem chu Chennai City leh Mumbai FC te chiah an ni a, Aizawl FC-in vawi hnih an hmachhawn ve ve tawh. Mizo club hian set piece aṭang ve vein goal hnih an chhuah a, tuna an result hian champion kalkawng a tibumboh sawt dawn a, chutihrualin match hmabak pali atana inzirna ṭha tak a ni thei bawk ang.

Kan thawkrim dawn - Khalid
Aizawl FC coach Khalid chuan, "Ka player-te'n an theihna zawng zawng an chhuah a, chak phu khawpin an khel ṭha a, point hnih hloh hi a na em em a ni," a ti.

An hmabak thlirin Khalid chuan, "Chona phurawm tak leh harsa takin min hmuak a, hemi hmachhawn tur hian rim leh zualin kan thawk ang," tiin Vanglaini palai a hrilh.

Kawng daltu Blues
Mohun Bagan-in I League nomawi vawi hnih chawi an tumna kawngah Benga­luru FC an tla zep a, Blues hian champion nomawi humhim theih hmel loh mah se an hmelma Mariners lakah tha an thlah duh lo.

Sanjoy Sen-a'n Mumbai FC nena khel ṭha tawk lo Jeje Lalpekhlua chu bench-ah dahin Balwant Singh leh Darryl Duffy te tlarhmaah an inkawp. Season hnuhnung pathuma I League thununtu club pahnihte hi an inhnehtawk.

Mariners left back Subashish Bose chu minute 69-naah m hnawhchhuah a ni. Player 10-a khel chungin Kolkata club-in captain Yusa Katsumi hmangin minute 85-naah goal an khung a, amaherawhchu referee-in Japanese midfielder hi keeper Arindam lakah a foul-ah ngaiin a pawmsak lo. Hun tawp dawn hnaiah Jeje-a rawn inlan a, Hnahthial tlangval hian danglamna a thlen thei bik lo.

Hmabak
Mohun Bagan hian April 1 khian Rabindra Sarobar Stadium-ah Bengaluru an mikhual ang a, hei hi club pahnihin Asia khawmualpui inelna an hmachhawn avanga an khelh loh kha a ni. I League Round 15-na chu April 9-ah khelh a ni ang a, Kolkata Derby-ah Bagan-in champion rinkai East Bengal an mikhual ang.

Aizawl FC hi match li khelh hmabak an la neihah vawi thum an la zin chhuak dawn a, April 9 zan hian Bengaluru FC an tlawh ang.