Chelsea el pha United?

Premier League-ah Jose Mourinho-a'n Chelsea-a amah thlaktu Antonio Conte a tluk lo a, Manchester United an champion a rinawm tawh loh. FA Cup-ah Portuguese manager-in phuba lakna remchang a nei a, amaherawhchu an inkhelhna tur hmun hi Stamford Bridge a ni.

FA Quarterfinal aṭangin replay khelh a awm dawn lo a, an inhnehtawk a nih pawhin extra time khelh mai tur a ni. Hei vang hian zanin dar 1:15-a club lian pahnih intawng tur hi a ngaihnawm sawt ang. Extra time hi khelh a nih chuan substitution pali siam theih a ni dawn a, mipa inelnaa substitution pali siam hmasak ber chu FIFA Club World Cup final nikum December thla a khelh kha niin Real Madrid forward Alvaro Morata-a'n United player hlui Cristiano Ronaldo a thlak.

Ibra tel loin
Manchester United-in veteran forward Zlatan Ibrahimovic hmangin EFL Cup-ah an champion a, Swede forward hian hrem vangin Chelsea a hmachhawn ve thei lo ang. Chutihrualin FA Cup-ah hian Europa League hrem vanga chhawr theih loh defender Eric Bailly an chhawr thei thung ang.

United coach Jose Mourinho chuan, "Russia ram kan tlawh aṭanga ni thum hnuah London kan pan nghal a ngai a, Zlatan kan chhawr thei dawn lo. Amaherawhchu Manchester United chuan club ṭhenkhat tih danin team chhe zawk tirh hi kan tih dan a ni lo," tiin an ṭhat dan bera Chelsea an hamchhawn tur thu a sawi.

Manchester Uni­ted hian Chel­sea an hmachhawn zawh hian Ningani zanah Russian club Rostov an mikhual leh nghal dawn. Portuguese manager chuan, "Europa League hi kan tan a pawimawh em em a, FA Cup hi inelna hlu tak a ni. Fixture awm dan chungchangah Chelsea-in thiam lohna an nei lo a, keini chuan nomawi chawi theihna apianga chawi hi kan duh dan a ni," tiin a sawi.

Europa League champion-in season thara Champions League khelh theihna a keng tel a, United hian season thara Europe-a club inelna sang ber khelh tumin league-ah palina nih phak an tum mek bawk.

Pogba vs Conte
Chelsea leh United inkhelh huna khaikhin hlawh tur chu French midfielder pahnih Paul Pogba leh N’Golo Kante te an ni. Chelsea boss Antonio Conte chuan, "Kante hi mi ṭha tak a ni a, game-ah chauh ni loin training-naah pawh 100% a pe ṭhin. Hetiang player hi ka lawm zawng an ni a, a chhan chu ka inkhelh hun laia ka khelh dan a ni. Chak tur chuan talent nei ṭha player ringawt ni loin khelmual chhunga tlan tam hi an pawimawh a ni," tiin a midfielder chungchang chhuang takin a sawi.

Italian manager Conte hian Juventus a enkawl laiin Pogba a enkawl tawh a, French midfielder chungchang sawiin, "Club dang player chanchin sawi hi ka duh dan a ni lo a, Paul bik erawh ka hnuaiah a khel tawh a, ka vannei hle a ni. Player ṭha ber zinga mi a ni a, chuvang chuan kan ven uluk a ṭul a, ani bakah hian United team hian player ṭha an kawl hnem avangin team anga kan ven a ṭul dawn a ni. Paul leh N’Golo te bikah chuan player ṭha ve ve an ni a, khelh dan inang lo an ni," tiin player pahnih a fak.

Premier League-ah Chelsea-in Pedro, Gary Cahill, Eden Hazard leh N’Golo Kante te goal hmangin Manchester United hi 4-0 in an sawp a, zaninah Stamford Bridge-ah an khelh nawn dawn avangin Blues hi chak tura rinkai an ni.