FA Cup Semifinal khel turin City leh Arsenal chak

Manchester City leh Arsenal ten FA Cup no­mawi chawi tura an beiseina an chhi nung zel a, Inrinni zan khan an khingpui ve ve hneh­in semifinal an lut. City tan Sergio Ague­ro-a'n a harhtharna chan chhun­zawm zelin Middles­­brough khel­mualah goal a khung a, a team hi 2-0 in hnehna a chanpui.

Bayern Munich laka mualpho hlim Arsenal-in an thinrim hrikthlak nan Lincoln City an hmang a, Emirates Stadium-ah goal nga zet khungin hnehna an chang. Tun hnaia Ar­senal fan-ten bang tura an nawr Arsene Wenger-a'n a season tawp ber ni theiah nomawi chawi loh duh loin players ṭha rual a luhtir a, non-league club a dim lo.

Champion duh Pep

Pep Guardiola-a'n league nomawi beisei ngam tawh lo mah se champion nomawi chawi loa English football-a a hun hmasa ber hman a duh lo. Kar hmasa Stoke City nen Premier League an khelh ṭumin Spanish manager hian risk lain David Silva leh Raheem Sterling-te bench-ah a dah a, Inrinni zan inkhel tur a thlirlawk - Boro lakah Pep-a ruahman angin Silva leh Sterling ten inkhel bul an ṭan a, thutlukna a siam sual lo.

Inkhel ṭan aṭanga mi­nute thumna lekah Silva hmuh turin a awm nghal a, Spanish midfielder hian Pablo Zabaleta ball cross chu Sterling-a kap kara a luh hnuah a khung. Minute 67-naah Aguero hun a thleng ve thung a, Argentine striker hian post a pet per hnuah a vanduai nawn tawh lo - Leroy Sane ball siam­sak chu an goal hnihna turin a khung. City hian 69% ball changin inkhel an thunun tluan chhuak zak a, lungawi lohna tur awmchhun chu goalkeeper Claudio Bravo bawk a ni. Joe Hart aia Pep-a rin zawk keeper hian Fabio ball tauh a man per a, John Stones chuan goal line aṭangin a lo pet chhuak hman hlauh!

Pep-a thukhawchang

City boss Pep Guar­diola chuan, "Inkhel ṭan­tir aṭangin kan thunun nghal a, chance tam tak kan hloh a, kan hun neih zozai kha goal-ah chantir vek thei ila chuan minute 30 hma lamah khan kan chak chiang tawh ang. Goal khung kawngah hmasawn kan ngai a, kan khelh danah erawh ka lawm a ni," a ti.

Barcelona boss hlui chuan goalkeeper Bravo chhan nghalin, "Claudio khan a khel ṭha takzet a, amah vangin vawiinah pawh goal kan chhuah lo. Ka naute nena thawhho hi nuam ka ti a, ka hlim takzet a ni," tiin a sawi.

Gunners laipui a puak

Tun dinhmunah Ar­senal leh Lincoln inkarah club 88 an awm a, club pahnih dinhmun a inthlau takzet. Mahse, Wenger-a'n nomawi chawi a duh tih pholangin players ṭha rual a luhtir a, a chhanna chu goal nga a ni. Inkhel ṭantirah goal lut lawk lo mah se Theo Walcott chuan first half hun pek belhah hmahruaina goal a khung a, an hawikir tawh lo.

Chawlhlawk hman a nih hnu rei loteah Olivier Giroud-a'n an goal hnihna a khung chhunzawm a, Arsenal puih an ngaih loh tehlul nen Luke Waterfall chuan an lamah a tih luh bawk avangin non-league club tan thawh ngaihna a awm tawh lo - Alexis Sanchez leh Aaron Ramsey ten goal khat ve ve khung ve lehin Champions League-a mualpho hlim Arsenal fan-ten nuihna tur an nei ve leh ta.

Wenger thukhawchang

Arsenal manager Ar­sene Wenger chuan, "Lincoln hi hlauh loh ngawt chi an ni lo a, Burn­ley, Ipswich leh Brighton hnawt chhuaktu an nih avangin dah hniam an harsa a ni. Second half inkhel kha chu kan ta a ni ber a, mah se Lincoln hi an thlenchin ropui tak avangin fak an phu a ni," tiin non-league club a fak.

French manager hi season tawpah a contract a zo tawh dawn a, inkhel ṭan hmain fans 200 bawr vel chuan stadium kawtah Wenger hi contract thar zawrh loh turin club thuneitute an ngen!