Mizoram hmaah Maharashtra

Mizoram inkhelh ni a thleng ta. Santosh Trophy vawi 71-na chu nimin khan Goa-ah khelh ṭan a ni a, vawiin hian Mizo­ram awmna Group B ten match hnih an khel ang.

Kum 2014 champion Mizoram hian GMC Athletic Stadium, Bambolim-ah Maharashtra nen an inhma­chhawn ang a, Punjab leh Rail­ways te Navelim-ah an inkhel bawk ang.

Kumin Santosh Trophy khelh nan hian natural grass vek hman a ni dawn a, stadium pathum Tilak Maidan Stadium, GMC Athetic Stadium leh Navelim-ah te khelh tur niin group match zawng zawng hi tlai dar 4:00-ah vek khelh a ni ang.

Maharashtra chu

Mizoram hian Maharashtra lakah record an la nei ṭha lo a, vawiina an in­khelh turah pawh hian Lalsangzuala Hmar hote hi chak zawka dah a thiang lo.

Kum 2013 khan Santosh Trophy Qualifier hi awmna bial ṭheuha khelh a la ni lo a, hemi ṭum hian Mizoram hi Maharashtra leh Uttar Pradesh nen awm hoin final round-ah team pahnih tan hmun ruak a awm.

Mizoramin an match hmasa berah Maharashtra hi 1-1 in an draw a, Uttar Pradesh an hneh loh zui avangin an tla. Tun I League-a Minerva Punjab midfielder Lalrempuia khelhna Maharashtra erawhin semifinal an thleng pha a, Kerala lakah an vanduai. Kum 2014-ah erawh Mizoramin Lalnunmawia leh Lalfakzuala-te goal hmangin Maharashtra hi an hneh a, an champion zui bawk.

Kum 2015-ah Mizoram leh Maharashtra ten final round lut ve ve mah se group khatah an awm lo a, Mizoramin semifinal-ah inelna thlengtu Punjab an hneh loh laiin Maharashtra erawh point thum chauh hmuin semifinal an thleng pha lo.

Nikumah team pahnih hi group khatah awmin Ma­hrashtra hian Mohammed Shabaz Pathan-a freekick hmangin Mizoram an hneh a, group hmahruaitu niin final an thleng a, Services lakah an vanduai. Mizoram erawhin champion zui ta Services hneh mah se pathumna niin semifinal an thleng pha lo.

Under 21 leh buaina

AIFF chuan kumin inelnaah Under 21 player a ngai pawi­mawh a, field chhungah engtiklai pawhin Kum 1997-a piang player pathum an awm reng tur a ni. India rama football thuneitu sang hian selector pahnih a tir a, Santosh Trophy hi Olympic team thlanna tur atan a hmang nghal dawn.

Kum naupang zawk telh a ngaih avangin team tinin harsatna an tawk vek dawn.

Champion lai Services assistant coach Abilhash chuan, "Under 21 player kan lakluhna hi a la rei loh avangin tawnhriat an la neih ṭhat loh chu thuhran ni s,e kan khelh dan phung an la man tawk lo," tiin kum dang an phak loh thu a sawi.

Mizoram tan buaina

Maharashtra hmachhawn turin Mizo player pahnih defender Lalhmunmawia leh keeper H. Lalremruata te an inlan thei dawn a, Hualngohmun tlangval Ahmuntea hi Under 21 player a nih avangin coach Sanga tan buaina tham a tling ang.

Mizoam team-ah hian Un­der 21 player paruk an awm a, Ahmuntea bakah keeper Lalruatpuia, defender Lal­mal­sawma, midfielder Lalrin­chhana, winger Jesse Laldinpuia leh Israel Laldingngheta te an awm a, heng zinga pathum hian bul an ṭan ngei tur a ni.

Qualifier leh NM Gupta football-a defence laia player pawimawh Ahmuntea aiah MPL5 best defender H. Lalhlimpuia chu captain Lal­rinchhana nen defence laiah an inkawp ang a, right back-ah Armed Veng South tlangval R. Laldinliana aiah rawlthar duhawm K. Lalmalsawma (U-21) thlan a ṭul bawk ang.

NM Gupta Football-a best keeper Lalmuanawma'n chance a neihin a theihna pholang ṭhin mah se goal khung tur lamah tawnhriat ngah player chhawr duh vangin Under 21 keeper Mama a ken a ṭul bawk.

Mizoram hian goal khung turin Police trio F. Lal­rinpuia, Lalfakzuala leh Lalbiakhlua te an nei a, midfield tiphui turin ONGC player V. Lal­chhuanawma bakah MPL5 best midfielder nominee ni pha Lalrinchhana te an awm bawk.

Eng nge an sawi?

Mizoram coach Sanga chuan, "Qualifying leh NM Gupta aiin hma kan sawn leh tawh a, structure kan bel lehzual tawh bawk. Ka nau­teah hian beiseina ka nei sang hle. Chutihrualin final round-ah chuan tu pawh an ṭha vek tawh a, chesual thei kan ni tih hre reng chungin fimkhur takin kan khel ang. Kan team boruak a ṭhain kan phur tlang a, chak ngei tum in theihtawp kan chhuah ang," tiin an inpeih thu a sawi.

Mizoram manager Lalthan­zama Vanchhawng chuan, "Nikuma kan hneh lohte an nih avangin kan ṭan phah a, kuminah chuan hneh ngei kan tum. Kan match khelh tur zel atan rilru kan pe a, Maharashtra hi hneh phawt kan tum dawn a ni. Ahmuna leh Arema inhliam erawh a pawi kan ti a, tawrh phah loh turin player rem kan tum dawn. Kumina an dan siam Under 21 player pathum khel ziah tur tih hian starting eleven thlan kawngah ngaihtuahna a tibuai hle bawk," tiin Vanglaini palai a hrilh.

Mizoram awmna Group B-ah hian Punjab, Railways, Kerala leh Maharashtra te an awm a, Group A-ah West Bengal, Meghalaya, Services, Goa leh Chandigarh te an awm thung.