Rakitic-a'n contract thar ziak

Barcelona midfielder Ivan Rakitic chuan Nou Camp-ah kum 2021 thleng cham chhunzawm turin contract thar a ziak a, a contract ang chuan Catalan club aṭanga lei chhuak duh an awm chuan pound maktaduai 109 insen an huam a ngai dawn!

Kum 28-a upa mid­fielder hian kum 2014 khan Sevilla aṭangin Barcelona hi a zawm a, inelna hrang hrangah match 145 inlan sakin goal 23 a khungsak tawh. Rakitic hian a contract neihsa ang chuan kum 2019 thleng Barcelona-ah hian hun a nei a, a contract thar hian hei hi a rawn thaichhe ta a ni.

Croatia tana vawi 82 inlan tawh midfielder chuan, "Ka tan chuan vawiin hi ni duhawm tak a ni a, Barcelona-a contract thar ka ziak thei hi ka hlim takzet a ni. Khawvela club ṭha bera awm a, contract thar neih bawk chu thilpek ropui ber ang mai a ni," tiin Catalan club tana rinawmna thu a tiam thei chu a hlim hle.

Rakitic chuan sawi chhunzawmin, "Ka nun zawng zawng hi Bar­celona-ah hman zawh vek ka duh. Ka ngaihtuahna luahtu ber chu khawvela club ṭha berah hian a rei thei ang ber cham chhun­zawm zel a, min duh chhung chu ka cham ang. Training-naa hlim taka kal a, khelmuala nuam ti taka khelh bawk hi a aia nuam a awm chuang tlat lo a ni," a ti a, Barcelona-ah a career hman zawh ngei a tum niin a lang.