World number 129 laka Murray chak lo

Andy Murray chu Indian Wells-a a match hmasa berah a chak lo nghal. Britain tlangval Murray hi nimin khan Vasek Pospisil lakah 6-4, 7-6 (7-5) in a chak lo.

Kumina ATP Tour 1000 events hmasa ber Indian Wells-a world number 1 Murray hi first round-ah a bye a, second round-a a khingpui Pospisil hi tunhma lama vawi li a hneh tawh a nih avangin chak zawk tura rinkai a ni. Mahse, beisei ang ngawtin thil a thleng lo. World number 129 Pospisil hian Murray-a service vawi nga chhuhsakin a vawi khat nan a hneh.

Kum 29-a upa Murray chuan, "A lungchhiat thlak takzet. Set hmasa ber kha la thei turin hun ṭha ka nei a, a ṭul lo taka double faults ka neih avangin ka tuar. Ka khel ṭha lo tih ka pawm a, a pawi ber erawh ka service ka hum hleithei lo kha a ni," tiin a sawi.

Murray hian kuminah beisei a phak rih lo hle, Grand Slam hmasa ber Australian Open-ah round of 16 a paltlang zo lo a, tournament pali khel tawhin Dubai Duty Free Cham­pionships-ah chiah a la champion.

Inkhel dangah seeded pasarihna Jo-Wilfried Tsonga chu Fabio Fognini lakah 7-6, 6-3, 6-4 in a chak lo a, seeded pathumna Stan Wawrinka, Gael Monfils (10) leh David Goffin (11) te erawhin hnehna an chang.