DSK tan Jerry Mawia leh Zuala an mawi

Maharashtra Derby-ah Mizo rawlthar Jerry Mawihmingthanga leh Lallianzuala Chhangte-ten DSK Shivajians tan goal 'mawi' an khung ve ve a, Inrinni zan khan an mikhual Mumbai FC lakah ṭhat chhuah duh loin 5-0 ngawtin an sawp.

Aizawl FC hneh lo hlim team aṭangin Dave Rogers-a'n players pathum a thlak danglam a, Sairuatkima, Biaklian Paite leh Seityasen Singh aiah Jerry Mawi­hmingthanga, Sanju Pradhan leh Sumeet Passi-te chu inkhel bul ṭantir an ni. Sairuata'n inkhel bul ṭan lo mah se minute 86-naah tlan luhtir a ni tho a, Lianzuala chu minute 59-naah tlanluhtir a ni bawk. Mumbai lamah defender Lalchhawnkima hun pumin a khel.

Goal a sur

DSK tan Assam striker Hali­charan Narzary chuan first half-ah goal hnih a khung a, chawlhlawk hman a nih hnuah Sanju Pradhan chuan an goal thumna a khung ve bawk. Minute 65 hnu lam erawh Mizo rawlthar chan a ni. Lunglei rawlthar Lallianzuala Chhangte chuan Mumbai penalty area-ah ball khalh lutin mawi lutukin a pet goal a, tawnhriat ngah goalkeeper Laxmikant Kattimani tan tih theih a awm lo.

Minute 83-na a ni a, Jerry Mawihmingthanga a inlar ve thung. Chanmari rawlthar hian Juan Quero thawhrah sengin an goal ngana mawi takin a khung a, Pune khawpuiah Mumbai-in tih theih an nei lo.

Kashyap a ngawi lo

Mumbai FC-in season ṭan­­tirah beiseina sang tak nen Santosh Kashyap an lalut a, Royal Wahingdoh boss hlui hian season tawpah a sang pathum zinga awm an tum thu a sawi - tunah erawh table mawngphah luahtu an ni. DSK nen an inkhelh hmain Mumbai fans engemaw zatin banner nen Kashyap an duh loh thu an tlangaupui a, Mohun Bagan boss hlui hi a ngawi mai mai bik lo.

AFC pro licence nei coach chuan, "Fan-te hi an rilru a na tih ka hria a, an dinhmun hi ka hrethiam a ni. Mahse keipawhin anni hnen aṭang hian hei aia ṭawiawmna ṭha zawk hi ka beisei ve tho. He hmunah hian keipawh hnathawk pakhat ve mai ka ni a, ka theihna zawng zawng ka pe a ni. Coach chauh hi mawhphurtu ka ni lo a, players, staff leh management kan vai hian mawhphurtu vek kan ni," a ti a, a chungah chauh fan-ten an lungawi lohna an leihbua chu a lawm loh thu a sawi.