Milan hnehtu Juve an sang zel
Minute 97-naa Paulo Dybala penalty chhuihluh hmangin Juventus chuan AC Milan 2-1 in an hneh hram. Turin club hian Serie A match 28 khelh tawh aṭanga point 70 hmuin pahnihna AS Roma aiin point 11 in an sang fal tawh.
Zirtawpni zan inkhelah Juve tan Medhi Benatia chuan minute 30-naah goal hmahruai a khung a, chawlhlawk hma hretin Milan tan Carlos Bacca chuan an si phurh a sut ve thung. Italian club hlun pahnihten point khat ve ve an insem ngei dawn niin a lang hman.
Mahse, hun pekbelhah Milan an buai. Jose Sosa chu Juve midfielder Kwadwo Asamoah laka a foul avangin minute 93-naah yellow card pahnihna pek a ni a, Milan midfielder hnawhchhuah a nih aṭanga minute linaah defender Mattia De Sciglio chuan hand ball vangin penalty a chawi bawk - Juve tan Dybala-a'n chakna goal khung nan a hmang zui. Argentine forward Dybala tan tun season-a a goal 13-na chiah a ni.
Massimiliano Allegri enkawl Juventus hian a zawnin an khelmualah league match 31 hnehna chang tawhin chak zawn rei record an siam belh zel a, a zawna a vawi ruk nan Serie A nomawi chawi an beisei mek. Milan erawh Juventus Stadium-ah league match an khelh hnuhnung pangaah chakni hmel an hmu lo.
Juventus hian tun season-ah Italian Super Cup final leh league match San Siro-a an khelh ṭumin Milan hi an hneh lo a, tun ṭumah hian hrem vangin Juan Cuadrado a inlan theih loh bakah Giorgio Chiellini, Stefano Sturaro leh Mario Mandzukic te chu hliam leh dam lohna vangin an inlan thei lo.
Italian champion hian an player langsar ṭhenkhat chhawr thei lo mah se an khingpui tlarhnung vawi duai lo an rumṭhaih thei. Khawvela player manto pathumna Gonzalo Higuain bakah Sami Khedira, Miralem Pjanic leh Pjaca te goal khung tur chu kum 18-a upa Gianluigi Donnarumma-a'n ropui takin a dan sak.
Eng nge an sawi?
Juve defender Dani Alves chuan, "Kan taksa bakah kan rilru pawh inkhel turin a inpeih. Tunah hian season kal meka hun pawimawh lai ber kan tawng mek a, nomawi chawi tura hun pawimawh laiah kan awm mek. Kan squad hi kan en chuan Serie A mai bakah Champions League nomawi chawi thei tur khawpin kan ṭha tawk," tiin a sawi.
Juventus hian Italy-ah kum nga chhung chu hnehsawh takin rorel tawh mah se Europe lamah beisei angin an hlawhtling lo. Thawhlehni zan hian Champions League last 16 second leg khel turin Porto an lo mikhual ang, Portuguese club lakah hian si hnih faiin hma an hruai tawh.
Milan coach Vincenzo Montella chuan, "Team ṭha tak nen kan inhmachhawn a, minute 90 chhung khan kan chhaih mangang thei hle. Kan team-ah hian hmasawnna a awm a, Juve lakah point hmu lo mah ila season tharah chuan Europe-a inlan ngei kan tum ruh hle," a ti. Italian manager hian penalty leh red card an hmuh chu sawi sawiselin awmzia a neih tawh loh avangin pawm thiam an tum thu a sawi tel bawk.