Atletico chakna Griezmann

Atletico Madrid-in La Liga nomawi beisei ngam chiah tawh lo mah se season thara Champions League khelh an tumna erawh a la reh lo. Inrinni zan khan hun tawp dawna Antoine Griezmann goal khat tauh luh hmangin khualmualah Granada 1-0 in an hneh a, league table-ah palina an ni.

Diego Simeone-a nauten Barcelona an hneh loh hnuah Deportivo La Coruna an inhnehtawkpui leh a, league nomawi an ban phakah a awm tawh lo. Mahse, an league match hnuhnunga Valencia 3-0 a an sawp hnuah Granada an hneh leh ta a, season thara Champions League khel turin an insawhnghet.

Atletico Madrid hian inkhel hautak pahnih an hmachhawn zui dawn, Nilani zanah Champions League last 16 second leg khel turin Bayer Leverkusen an lo mikhual dawn a, kartawpah league lama an elpui Sevilla an hmachhawn zui leh dawn bawk.

Simeone chuan, "League-a palina nih phak hi thil pawimawh tak a ni. Chutihrualin tuna kan ngaihtuah hmasak tur chu Leverkusen nen kan inkhelh tur hi a ni. German club kan paltlang hmasak phawt a ngai a, chumi hnuah inkhel dang chu kan ngaihtuah chauh ang," a ti.

Argentine manager hian Barcelona-in Paris Saint-Germain 6-5 a an lehthal theih avangin Champions League-ah tlang tur chiang zawk sawi lawk theih a nih loh thu a sawi tel bawk - Atletico hian khualmuaah 4-2 in hnehna an chang tawh.

Inkhel dangah Sevilla chu Leganes nen 1-1 in an inhnehtawk a, league match khelh hmabak 12 chauh a awm tawh avangin Jorge Sampaoli naute tan nomawi chawi tur chuan an chunga awm Barcelona leh Real Madrid te chetsual chan a ngai tawh dawn a ni.

Sevilla manager Sampaoli chuan, "Tihsual kan neih chuan kan khingpui ten min hrem zel ṭhin, hei chu football kalphung pakhat a ni. Champions League khel turin Leicester City kan hmachhawn zui dawn a, Foxes lakah chuan tun ṭuma kan chetsual ang hi chu tih nawn a thiang tawh lo ang," tiin a sawi.

Sampaoli chuan sawi chhunzawmin, "Tunah hian a zawnin league match pahnihah kan chak zo lo ta a, miṭhenkhat chuan kan tlachhe duai angin an sawi leh der tawh, kan hriat tur chu tun season league match 27 khelh tawh aṭangin vawi li chiah chak loh kan la nei, kan tla chhe lo - kan tho leh em em ang," tiin chakni hmel an hmuh leh thuai a beisei thu a sawi.