Newcastle United an tawlhthlu

Season thara Premier League khelh leh ngei tum Newcastle United-in kum 16-a upa Ryan Sessegnon an ngam lo a, Fulham lak­ah 3-1 in an mualpho. St James' Park-a inkhelah hian Fulham tan rawlthar duhawm Sessegnon hian goal hnih a khung a, Tom Cairney chuan yard 25 aṭangin goal ropui a khung bawk.

Newcastle-in goal thum an chhuah hnuah Daryl Murphy chuan mualneitu mualpho zualpui khuh nan goal khat a khung ve a, Fulham tan hun pek belha penalty pettu Tim Ream chuan a pet out bawk. Magpies hian Cham­pionship-ah point 77 hmuin hma la hruai tho mah se an hnuai chiaha awm Brighton & Hove Albion nen an point hmuh zat a in ang tawh. Championship-a a sang pahnihin auto­matic-in Premier Lea­gue an inhlangkai ṭhin a, pathumna aṭanga paruknain playoff an khel ṭhin thung. Match kua khelh tur la awmah pathumna Huddersfield aia Rafael Benitez-a naute sanna chu point ruk chauh a ni ta bawk.

Thawnthu hlui keu let erawh chuan Magpies tan lungphanna tur a awm lo. Championship season hnuhnung 10-ah khan point 86 hmu phak chian club chu automatic-in Premier League an la inhlangkai thei zel a, hei hi a thleng dik leh dawn a nih chuan Newcastle tan match thum bak chak a ngai tawh lo.