Lewandowski-a'n goal 100 khung ta

Bayern Munich chuan Robert Lewan­dowski goal hnih hmangin Ein­tracht Frankfurt 3-0 in an sawp a, inkhel dangah an elpui RB Leipzig leh Borussia Dortmund te an chak loh avangin Bundesliga season kal mekah point 10 in a sang fal tawh.

Inrinni zan Allianz Arena-a inkhelah Lewan­dow­ski-a'n minute 38 leh 55-ah goal a khung a, Douglas Costa chuan goal khat a thawh ve bawk. Poland international striker Lewandowski hian tun season-ah league goal 20 a khungna niin, kum 2014 June thlaa Dortmund aṭnga Bayern Munich a zawm hnuah inelna hrang hrangah match 136 a khelh aṭangin goal 100 a khung tling ta.

Kum 28-a upa Lewandowski chuan, "Goal ka khung apiang hian ka lawm thei hle a, mimal hmingṭhatna neih belh ringawt erawh ka tum ber a ni lo. A pawimawh ber chu kan team-in point kan hmuh belh zel hi a ni a, tunah league table chung berah kan awm avangin a lungawi thlak rih hle," tiin a sawi.

Frankfurt tan hian Marco Russ chu nikum May thla hnua a vawi khat nan a inlan ve leh, kap bawr cancer vanga hun rei tak a chawlh hnuah kum 30-a upa defender hi inkhel turin a dam leh tawh!

Inkhel dangah Dortmund tan Pierre-Emerick Aubameyang chuan tun season kal meka inelna hrang hrangah a goal 32-na khung mah se Hertha BSC lakah 2-1 in an chak lo. Champions League last 16-a Benfica 4-0 a sawp thei Dortmund hi Bundesliga-ah pathumna an ni mek.

Kaithar Leipzig chu Wolfsburg lakah 1-0 in an chak lo ve bawk a, Wolfsburg goal neihchhun hi Mario Gomez khung a ni. Beisei aia season hmang ṭha Leipzig hian hmahruaitu Bayern chu point 10 in an phak lo tawh.