Gauff leh Swiatek intawng dawn

French Open hmeichhe singles final a hmuhnawm dawn. Inrinni zan dar 6:30 hian American tleirawl Coco Gauff leh world number 1 Iga Swiatek ten nomawi an inchuh dawn, tunlai player ṭha pahnih an ni.

Gauff tan Grand Slam final hmasa ber a ni dawn. Swiatek erawh 2020 khan Roland Garros-ah hian a lo champion tawh, a tan thil thar a ni dawn lo, season an hman dan chhutin inkhel hmuhnawm an chhawp chhuah ngei a rinawm.

Swiatek a ṭha
Ningani zan khan Philippe-Chatrier-ah semifinal khelh niin, seeded pakhatna Swiatek hian Daria Kasatkina chu 6-2, 6-1 in an hneh a, tun hnaiah a zawnin match 34 chhung hnehna a chang tling ta chiah.

A zawna hnehna chan hnem lamah Swiatek-i'n Serena Williams a nih rual chiah, final-ah a chak leh a nih chuan Venus Williams (35 wins) a nih rual leh ang. Martina Navratilova (74), Steffi Graf (66) leh Martina Navratilova (58) te erawh a la hlat deuh.

Doha, Indian Wells, Miami, Stuttgart leh Rome Open-ah a zawnin hnehna a chang ta a, world number 1 a nih laia chawl ta Ashleigh Barty hmun ruak chu a hnawh khat hneh hle, inelna lian ber erawh a hmawr a la bawk lo deuh.

Kum 21 mi Swiatek chuan, "Tun hma zawng aiin ka khel ṭha zawkin ka hria, a hma aia ṭha zawka khelh theih hi chu a lawmawm. Final ka la hmabak, a vawi hnihna tur a nih avangin a boruak chu ka hrethiam turah ka ngai.

"A zawna match chak hnem hi thil pawimawh ber a ni hran lo, a pawimawh zawk chu hmasawnna ka nei zel em, tih lai hi a ni," a ti. French Open 2022-ah hian match ruk a khel tawh a, set khat chiah a la hloh.

Tleirawl duhawm
Coco Gauff hming hi i hriatna a rei tawh mai thei, tennis khawvelah chuan a mikhual lo. Mahse, tunah hian kum 18 mi chauh a la ni. American tleirawl hian kum naupangte a nih lai aṭangin khawvel hmelhriat a hlawh tawh.

Grand Slam pali zingah French Open hi a khelh fuhna ber a la ni zel, tunah chuan major tournament hial a inhlangkai ta. Semifinal-ah Martina Trevisan chu darkar khat leh minute 28 chhungin 6-3, 6-1 in a paltlang - harsatna a tawk lo.

Gauff chuan, "Hlauhthawnna ka nei lo, nuam ti leh hlim takin French Open hi ka khel. Zingkarah insawizawi turin kawngah ka kal ṭhin, ka ngaihtuahnaah thil tam tak a lo lut a, hlauh leh huphurna ka nei lo hi a lawmawm," tiin a zam loh thu a sawi.

French Open hma lawk khan Gauff-i hian high school a zo ve chiah a, tennis bakah zirna lam a kalpui bawk avangin fak a hlawh. Infiamna huanga sang tak a thleng dawn a nih erawh chuan lehkha zir nen chuan kalkawp reng theih erawh a ni lo ang.

Tun ṭuma a hneh tak Trevisan hian 2020 khan Gauff hi French Open second round-ah a loa hneh tawh, tunah erawh result a letling ta thawk. Inrintawkna sang tak nen final a khel thei a nih ngat chuan Grand Slam champion a ni thei ngei ang.

Mipa Final
Nizan khan French Open mipa semifinal khelh a ni. Vawi 13 champion tawh Rafael Nadal leh Alexander Zverev an intum a, semifinal lehlamah Casper Ruud leh Marin Cilic te an inhmachhawn thung - result kan hre hman lo.

Player pali zingah Nadal chiah hi French Open champion hlui a ni, Grand Slam vawi 21 champion tawhin record nei ṭha ber a ni bawk. Cilic-a'n US Open title a la tawh a, midang pahnih erawhin major title an la hlawh chhuak ngai lo.

Ruahman dan chuan French Open mipa final hi Pathianni zan dar 6:30 aṭanga khelh a ni dawn.