Khelo India-ah Mizo infiammi 59 tel

Khelo India Youth Games chu zanin dar 6:00 hian Tau Devi Lal Stadium, Haryana-ah khelh ṭan a ni dawn. Mizoramin inelna hmachhawn tur hian infiammi 59 an tir a, Chef De Mission leh supporting staff 13 nen an vaiin 73 an tel a ni.

Mizoram team Chef De Mission Vanlalrova chuan, "Kan naute hi an camp char char a, beisei pawh kan nei sang ve hle. Kan vanneih chuan medal 10 kan hlawh theih ka ring a, a chhe berah panga te chu la turah ka inngai," tiin Vanglaini a hrilh.

Mizoram hi football, boxing leh judo-ah mipa leh hmeichhia an tel vek a, badminton, table tennis, Thang-Ta leh Weightlifting-ah an tel bawk.

Khelo India Youth Games hi duh duh tel mai theihna a ni lo a, infiammite hi school/college zirlai an nih a ngai. Team game-ah hian India ranking-ah pariatna an nih phak a ngai a, individual-ah pawh India ramah pariatna an nih loh pawhin wild card-a tel turin national level-a medal lak phak a ngai. Inelna hi kum 17 leh kum 21 hnuai lam te tan inelna hi buatsaih ṭhin a ni.