August aṭangin MPL

June 2 khan Mizoram Football Asso-ciation Executive Committee meeting neih a ni a, tun season-ah (2022-2023) Mizoram Premier League khelh chhunzawm turin an rel a, August - December thla chhunga khelh a ni ang.

MPL
Mizoram chhunga football inelna sang ber MPL chu kum 2019 hnuah khelh a ni tawh lo. December 14, 2019 khan Aizawl FC chuan final-ah Electric Veng FC 2-0 in an hneh a, I League club hi a vawi li nan an champion a, nomawi chawi hnuhnung ber an ni bawk.

Covid-19 hri leng vangin kum hnih leh a chanve chhung chu MPL khelh a ni tawh lo a, tualchhung footballer-ten inelna neih hun an nghakhlel hle. Tunah chuan chanchin ngaihnawm an hre ta a, MFA chuan inelna nei turin an rel.

Inelna ṭha tak neih a nih theih nan Study Group an din. MFA chuan MPL kalpui dan a thlirlet a, club neitute harsatna tawhte hriatpui chungin footballer-te hamṭhatna tur te, inkhel entute tana phurawm zawk tur leh khuareia MPL kal zelna tura ṭhate zirchian turin a rel a ni.

MFA Golden Jubilee
MFA hi kum 1973-a din niin nakkum, 2023 hi a kum 50-na tur a ni. Mizoram chhunga football thuneitu sang ber chuan Golden Jubilee hi lawm ngei an tum a ni.

CRS & Transfer Window
MFA General Body Meeting-in a rel angin Mizoram pumah player ziah luhna inang tlâng AIFF Centralised Registration System kalpui ṭan a ni dâwn a, hemi chungchang inzirtirna hi Mizoram hmun hrang hrangah buatsaih a ni ang.

Tun season transfer window hmasa zawk atan July 1-30 hman a rel a, hemi chhung hian MFA leh DFA hnuaia club-ten tualchhung player-te registration chu CRS hmangin an kalpui ang.

I Day Football
Tun season-ah Independence Day Football khelh a ni leh dâwn a, mipa, hmeichhia leh veteran inelna kalpui a ni ang.

MFA hian June thla aṭangin All Mizoram Football Inter Village Football Tournament a buatsaih dawn a, hemi chhung hian I Day Football kalpui dan tur a ngaihtuah fel ang.

MC Training
MFA chuan inkhel kaihruaitu tur Match Commissioner ṭhahnem zawk chher chhuah ṭha a ti a, MC-te tana training-na hun siam a ni ang.

Hei bakah hian MFA hnuaia referee-te koh khawma intuaitharna hun neih an rel bawk. Mizorama football thuneitu sang hian player leh coach-te ang bawkin referee-te pawimawhna an hria a, referee ṭha zawk neih tumin hma an la dawn.

Hmeichhe Football
All Manipur Football Association chuan July 7-24 chhung hian 1st NE Womens Football Tournament an buatsaih dawn a, MFA chuan team tirh ngei a tum.

Nikum khan Mizoram hmeichhe team chuan Hero Senior Women's National Football Championship-ah semifinal an thleng a, Railways lakah an vanduai a ni.