Tuikual South-in Chawnpui an hneh ; Zaninah Hotshots hmaah fiahin awm dawn
Mizoram Super League Season 7-ah Tuikual South-in an match hmasa berah Mizo hlanga khel Chawnpui BC chu 88-73 in an hneh a, zanin dar 8:00 hian R. Dengṭhuama Hall, Mualpuiah MSV Hotshots nen an inkhel leh nghal ang.
MSV Hotshots hi MSL team thar an ni a, an match hmasa berah Chanmari Vikings 78-72 in an hneh. Hotshots leh TKS hian an match hmasa berah hnehna an chang ve ve a, zanin hi team pahnih tan fiahna tur a ni.
TKS tan R-a
Tuikual South coach Ricky Lallawmkima chuan, "MSL7 hi kan hun a ni, tumahin min dang dawn lo," tiin Chawnpui an hmachhawn hmain a sawi a, an match hmasa berah hnehna chang mah se team dang chunga leng tura dah ngam chi an la ni lo.
TKS hian Mizo hlanga khel Chawnpui chu 88-73 in an hneh a, hun tawpah point 15 ngawtin inthlau mah se quarter tawp berah hnufual zawka ṭan lai an nei a, harsa takin hnehna an chang.
Tuikual South tan United States aṭanga an chah luh Darrell Bowie a inlan a, feet ruk leh inches riata sang ni mah se a inlan hmasak berah beisei a pha lo.
Chutihrualin Bowie hi chakna kawngah a pawimawh tho a, a lenna hmang ṭangkai loin ball petuah a ṭang zawk - assist vawi 15 zet a nei. Inkhel langsar ber erawh Bungkawn tlangval Lalnunpuia (R-a) a ni a, point 40 tehmeuh neiin team chakna hnar a ni.
Coach Ricky chuan, "R-a hian a thawhrim rah a seng a, practice-naah pawh a thleng hmasa ber. Ka thleng hma viau chungin ka thlen hi chuan a thlan a lo tla hnap tawh ṭhin," tiin a fak.
Chawnpui chak lo mah se fak phu khawpin an khel ṭha a, Laltlanhlua, Lallianmawia leh Zodina Chawngthu te an hmuhnawm hle. Amaherawhchu, Chawnpui hian state pawn player an nei lo a, MSL-a inham tan a harsa khawp ang.
Fiahna chu
Mission Veng Hotshots-in an match hmasa bera Chanmari Vikings an hneh ṭumin state pawn player Arshdeep Singh-a'n point 22 a nei a, Tuikual South an hmachhawn hunah Cleveland aṭanga an chah Josua Aaron Keyes an chhawr thei dawn. Foreigner nei pahnih inkhel a nih dawn avangin inkhel hi a hmuhnawm khawp ang.
TKS coach Ricky chuan, "A harsa tawh dawn. Chawnpui kha kan match hmasa ber a nih avangin a harsa a, Hotshots chu hnamdang pahnih an neih avangin chak a har ang. Hnehna kan chan ka ring a, chutihrualin chiang taka chak chu beisei ngam chi a ni lo," tiin an intum tawk tur thu a sawi.
Hotshots hian Khatla TBL-a player pawimawh ni ṭhin Eddie Zairemmawia an kawl a, hmun pawimawh a chang pha. Eddie hian point 15 a nei a, chutihrualin Mizo player-ah ngau ngau chuan TKS an langsar hretah a ngaih theih.
Hotshots coach David Lalruatfela chuan, "Keini chuan R-a bik kha kan veng dawn lo a, Dede-a leh Dina pawh ni se, an vaiin uluk takin kan veng vek ang. TKS inkhel kan hmu a, an ṭhatzia kan hria. Chak tur chuan theihtawp chhuah a ṭul dawn a ni," tiin Vanglaini a hrilh.