Spain leh Portugal an inhnehtawk

Sawiselna karah UEFA Nations League pawh khelh chhunzawm zel a ni a, Ningani zan khan League A inkhel ngaihven hlawhah Spain leh Portugal chu 1-1 in an inhnehtawk.

Spain tan Alvaro Morata chuan minute 25-naah goal hmahruai a khung a, Juventus striker-in goal a khung theih nana Gavi leh Pablo Sarabia te nena an ball inpe vel chu mit titlai a tling.

Luis Enrique enkawl team hian ball chang tam zui mah se a pawimawh ber goal an khung belh thei lo a, a tawpah an tuar - Ricardo Horta chuan hun tawp nan minute riat chiah a awm tawh tihah si phurh sutna goal a rawn khung a, 1-1 in inkhel a tawp.

Kum 27 mi Horta hian kum 2014 khan ram tan a match hmasa ber a lo khel tawh a, khatihlai khan kum 19 mi chauh a ni - kum riat hnuah ram tan koh a ni ve leh ta a, minute 72-naah bench aṭanga luhtir a ni chauh chungin si phurh sutna goal a khung.

Horta hian season hman zawh takah khan Braga tan match 49 khelin goal 23 a khung a, a phu ang ngeia ram tana koh a nih hnuah goal a khung nghal - kum 27 chauh a la nih avangin hmabak êng tak a la nei.

Spain-in 1-0 a hma an la hruai laiin Carlos Soler chuan Spain hmahruaina belhchhah theihna remchang vawi hnih ngawt a nei a, mahse, goal-ah a chantir thei lo ve ve.

Hetihlai hian Portugal forward Rafael Leao pawhin a team tan goal khung theihna remchang vawi hnih a nei a, a chhawr thei bik lo - kum 2019 Nations League champion Portugal hian minute 62-naah Cristiano Ronaldo an luhtir a, mahse, goal a keng tel lo.

Spain-in inelna hrang hranga an match hnuhnung pakuaah vawi hnih chiah chak zawh loh an nei - tuna Portugal an inhnehtawkpui leh, nikum Nations League final-a France an ngam loh chu a ni.

Thil mak danglam ve tak chu Spain leh Portugal hi kum 10 dawn chu chak zawk awm loin an lo intawng tawh a, an intawn hnuhnung vawi kuaah hian an inhnehtawk vek a ni.

League A, group 2 inkhel dangah Czech Republic chuan 2-1 in Switzerland an hneh a, Czech tana Jan Kuchta goal hmahruai chu Swiss team-in Noah Okafor hmangin chhanglet mah se Djibril Sow chuan an lamah a ti lut ve leh a, 2-1 in mikhual Switzerland an tlawm.

Ningani zana League B inkhel ngaihven hlawhah Norway chuan 1-0 in Serbia an hneh a, Erling Haaland chuan minute 26-naah inkhela goal awmchhun a khung.

Nizan khan Nations League inkhel match riat a awm a, he thu buatsaih a nih lai hian result kan hre hman lo - zanin leh Pathianni zanah pawh match a awm leh nual dawn a, ngaihven hlawh zual zingah zanin dar 9:30-a Hungary leh England inkhel tur chu a tel.

League A Results
June 2, Ningani Zan
Czech Republic 2 - 1 Switzerland
CZE: Jan Kuchta 11'; Djibril Sow 58' (OG)
SWI: Noah Okafor 44'
Spain 1 - 1 Portugal
SPA: Álvaro Morata 25'
POR: Ricardo Horta 82'
League A - Zanin Inkhel Tur
Hungary 09:30 PM England
Italy 12:15 AM Germany
League A - June 5, Pathianni Zan
Czech Republic 12:15 AM Spain
Portugal 12:15 AM Switzerland