Premier League nena sawi zawm an hraw
Season a zo chauh emaw tih laiin Premier League club-te transfer bazar thawm kan hre chho leh ṭan a, ṭum dang zawng aiin English club-te an hmanhmawh hlawm - thlasikah World Cup khelh a nih dawn avangin Premier League ṭan hma a ni dawn a, transfer lama club an hmanhmawh hi a awm lo hran lo.
Manchester City-in Borussia Dortmund goal khung khawl Erling Haaland an lakluh chu tun dinhmuna thawm lian ber a ni rih a, Liverpool-in Fabio Carvalho an lalut tawh a, Atson Villa-in Diego Carlos leh Boubacar Kamara an lalut a, Tottenham Hotspur-in free transfer-in Ivan Perisic an lalut a, Leeds United-in Red Bull Salzburg aṭangin Brenden Aaronson an beisei bawk.
Anni ho bakah hian player theihna nei sang tak tak, Premier League club nena sawizawm an la awm nual a, kan rawn tarlan tur chin ringawt pawh hian Premier League club zawm se English football chu a hmuhnawm phah sawt dawn tih a chiang.
Darwin Nunez
Nipui transfer-a media titi luah hneh ber pawl a ni a, season hman zawh taka a inkhel en chuan a chhan an hria ang - Benfica striker hian English club lian tam tak chil a tiput.
Kum 22 mi striker hian season hman zawh takah khan Benfica tan match 43 khelin goal 34 ngawt a khung a, Champions League-ah goal ruk lai a khung bawk avangin an league khelhna hniam vanga goal khung hnemah puh a rem lo.
Liverpool, Arsenal, Manchester United leh Newcastle United ten Uruguayan striker hi an hmu tai hle nia sawi a ni a, mahse, Portuguese club hian an hnena kum thum lai contract la nei an forward hi pound maktaduai 100 aia tlawma kaltir an remti lo nia sawi a ni.
Christopher Nkunku
Kum 24 mi Nkunku hi a khel i la hmu lo a nih pawhin a a hming chu i hre tawh ang - khawthlang infiamna ziaktutena an lam ngun pawl tak a nih miau avangin a awm lo hran lo.
Bundesliga player of the season-a thlan forward hian RB Leipzig tan league match 34-ah goal 20 a khung a, assist vawi 13 a nei bawk - inelna hrang hrangah goal 35 a khung.
Chelsea leh Manchester United chuan Nkunku hi an inchuh mek nia sawi a ni a, amah siam liantu Paris St-Germain pawhin an striker hlui hi laklet dan an ngaihtuah mek niin an sawi bawk.
Hugo Ekitike
Kum 19 mi lek ni mah se Ligue 1 lamah chuan striker 'hot' ber pawl a ni leh der tawh a, January khan Reims striker hi Newcastle United chuan an lo beisei daih tawh - nipui a ni a, chuhpuitu tur an ngah ta thung!
Sadio Mane chân thei dinhmuna ding Liverpool-in player an melh kual ve reng a, Ekitike hming pawh Anfield-ah a ri ve leh tawh - Steven Gerrard enkawl Aston Villa chuan lakluh an duh bawk.
France under-20 interational hian season hman zawh takah khan league leh cup match 26 a khel a, goal 11 a khung bakah assist vawi li a nei a, Reims president Jean-Pierre Caillot chuan an player hi nipuiah a chhuah a rin thu a sawi tawh a, £40mtd man bawr vel a ni ang.
Ousmane Dembele
French forward Ousmane Dembele theihna sanzia inhrilh nawn a ngai lo - mahse, tun nipuiah a contract a hmang zo tawh dawn a, Xavi-a'n cham tura a duh chungin an inrem thei lo.
Khelmual aiin damdawi inah hun a hmang ngun zawk em ni chu aw, tih tur a ni ṭhin a, mahse, season tawp lama Barca tana a chet dan hmutu club tan chuan free transfer-a lakluh theih a nih laia bawh ruak ruak hi tihawm tak a ni.
Kum 2017-a pound maktaduai 136-a Borussia Dortmund aṭanga Barcelona pantu hi Liverpool, Chelsea, Manchester United leh Paris St-Germain te nen sawi zawm mek a ni a, season hman zawh takah khan league match 21-ah goal khat khungin assist vawi 13 a nei.
Moussa Diaby
Bayer Leverkusen winger Moussa Diaby hi Arsenal leh Newcastle United ten lakluh ngei an duh nia sawi a ni a, season hman zawh takah khan inelna hrang hrangah match 42 khelin goal 17 a khung a, assist vawi 14 a nei bawk.
Bundesliga club tana a season hman dan thlirin duhtu a ngah hi thil awm tak a ni a, chutihrual chuan Leverkusen lam hian chelh beh an duh dawn avangin a man a tlawm thei lo ang.
Kum 22 mi winger hi nikum aṭang khan France tana khel tura koh a ni ve ṭan a, ram tan match nga a khel tawh a, goal khung a la nei lo - Paris Saint-Germain aṭanga inzir chhuak forward lei tur chuan pound maktaduai 60 tal sen inhuam a ṭul ang.
Julian Alvarez
Argentina forward hian January khan Manchester City a zawm fel tawh a, mahse, a club River Plate lamah loan-a kaltir a nih zui avangin Premier League-ah kan la hmu lo.
'New Aguero' hming lem an pek forward manah hian City-in £14.4mtd bak an seng lo a, tun season inelna hrang hrangah match 17 khelin goal 14 a khung a, assist vawi li a nei bawk - Copa Libertadores group stage match-a 8-1 ngawta Alianza Lima an sawp ṭuma a goal ruk khung chuan sawi a hlawh hle.
Kum 22 mi forward hi Haaland-a chanchinin hliah khuh viau mah se City-a hming chher turin a ṭha tawk a, Premier League-a a che tla vel fans tam takin hmuh an châk tawh.