A êng ber Titans
Indian Premier League champion nih tuma, thla hnih tal tawp mai ropuina rama lut tura inchuh team 10 zingah, a tawpa dingchang chu Gujarat Titans an ni.
Titans hi kan ni heltu planet zinga lian ber dawttu Saturn heltu thla, he Solar System a lar zet mai, Titan hming chawia an phuah a ni.
Final khelhna hmun kha Ahmedabad khuaa Modi Stadium a ni a, mipui nuai chuang lenna niin an khat vek. Mipui nuai chuang chhimtu hmaa, halmawi chitin reng hmanga Hardik Pandia an champion nomawi a chawikang lai thlalak kha, cricket thawnthu ngaihnawm zual zinga ṭhangthar lo la awm leh zel turte pawhin an enlet leh fo tur a ni ngei ang.
A thiam ber an champion
Zep thu a awm lo, Gujarat Titans-in group stage lamah hnehsawh takin ro an rel. An inkhel kan hmuh chin leh an players te ke chheh (form) han thlirin, Hardik Pandya leh a hote hi, an championa dal thei tur awmchhun chu anmahni leh anmahni chauh a ni tih a chiang.
Inkhel fuh loh ni emaw, mangchhiat tuk an tawng thut a nih loh chuan an champion dawn tih kha cricket khawvela mi tam zawk rin lawk dan pawh a ni a, an champion ta reng bawk.
Lang lo lama langsar
Kaptan mawhphurna a lak hnua puitling sawt Hardik Pandya chanchin emaw, an ball vawm thiam tal na tak Rashid Khan, Md Shami te emaw, harhna chang thar Shubman Gill, David Miller te chanchin thai lan ka tum lem lo.
Mahse, football khawvel anga hmatawng leh mawhphurna ko ber Manager/Coach te hi cricket-ah ni chiah lo mah se, captain leh player-te pui leh inrintawkna pe tura pawimawh ber an ni tho tho.
Gujarat head coach Ashish Nehra hi tun aṭang chuan cricket khawvelin a dah hniam thei dawn lo hrim hrim. Tin, Ashish Nehra te inkhelh laia, 2011 a India-in World Cup an champion ṭuma an Head Coach, tuna Gujarat Titans mentor Gary Kirsten a thawh hlawkzia hi hai theih rual a ni lo.
Ball vawm lama team dang el phak rual lova Gujarat an tal hiar hi an head coach kan en chuan thilmak a ni lo a, David Miller a ten harh tharna an chang hi, 'revival' thlentuah Gary Kirsten hming kan lam lo thei lo ang.
Final
Rajasthan Captain in ṭhumvawra an vanneih hnua vuak hmasak a thlang tlat kha, mi tam zawk mak tih a hlawh. Group stage lama ṭum hnih leh Qualifier 1-a an lo ngam tawh loh Gujarat Titans lakah strategy hman tur an haihchham tih a chiang.
Chutihrual chuan Gujarat Titans ho khelmual ni mahse, tun tournament-ah hian Ahmedabad pitch-ah hian an la khel ve miah lo a, a hma ni hnih lawkah Rajasthan hi chuan Qualifier 2 an lo khel tawh a ni kha.
Ṭhumvawr chak bak kha chu tun Pathianni zan khan Rajasthan Royals tan eng thil mah kha a dik thei lo zui vek. An innghahna lungpui Jose Buttler-a'n ṭum dang a pha lo a, target run 130 kha chuan, Hardik Pandya leh a naute a tithlaphang eih dawn lo tih a chiang. Champion tur team khuanu lo duan lawk an champion kan ti thei mai awm e.
A ṭiak leh ta
IPL 2022 inkhawmpui chu a lo ṭiak leh ta a, star thar an piang a, beisei pha lo an awm nuk a, siak sei tawh player tam takin he inkhawmpui hi harh tharna chan nan an hmang bawk a, ṭhenkhat lah dak leh zual nan.
Heng zawng zawng hian infiamna khawvel ropuizia a khaikhawm kan ti lo thei lo ang. Cricket game hi champion dik tak a ni tiin a hmawr kan bawk thei awm e. Heng zawng zawngah hian BCCI hi lungawi lohna a neih ka ring lo a, a chhan chu Media rights thar kum 2023-27 inkar atana an sum lakluh tur pawh hi, mithiamte lo chhut lawk danah cheng vaibelchhe nuai ruk vel tura ngaih a ni ( Rs 6,00,00,00,00,000).
IPL leh hma loh zawng. Bye bye phawt ule.