Huaisen takin Boston Celtics an chak
NBA Finals game 1 khelh a ni a, an inkhelhna hmun chu Chase Center a ni. San Francisco, California-a awm basketball court hi Golden State Warriors tan vanram ang mai a nih laiin, mikhual team tan erawh hremhmun ang hiala sawi theih a ni.
Mahse, he khelmualah ngei hian Boston Celtics chuan hnehna an chang! Tun season playoff-ah a zawna match kua zet hnehna an chan tawhna hmunah Warriors hian bul ṭan fuhin hma hruai fal mah se, a tawpah chuan 120-108 in an chak lo.
Game 1 an lak avangin Boston hi an champion dawn chiang tihna erawh a la ni bik lo. June 6, Thawhṭanni zing dar 5:30 hian game 2 an khel leh nghal dawn, chumi hnuah erawh a zawna match hnih khel turin TD Garden an pan thung ang.
A tirah GSW
Inkhel ṭan tir aṭangin Golden State an hmuhnawm, player ṭha bik Stephen Curry-a'n a tir lam minute 12 chhungin 3 point vawi ruk a vawm lut hman! Quarter hmasa berah hian point 21 teh meuh neiin a team chu dinhmun ṭha takah a hlangkai.
Kum 1993 daih tawh khan Michael Jordan chuan NBA Fianls game 4 an khelh laiin record a lo siam tawh. Phoenix nen an intum ṭumin quarter hnuhnung berah point 22 a nei, hemi tih lohah chuan Curry (21 points) hi quarter khata point nei hnem a ni leh chiah.
Curry che ṭha viau mah se Celtics lam an ṭang ve tlat, chawlhlawk an hman laia Goden State san zawkna chu point li a ni a, quarter thumnaah erawh Steve Kerr-a naute hi 38-24 a sang zawkin an hmahruaina an sawh nghet.
A tawpah Celtics
Warriors coach Kerr ngaih a ṭha a, quarter hnuhnung ber tir lamah point 10 zeta hma an hruai avangin Curry chu a hahchawlhtir. GSW inthlahdul lai tak hi Boston Celtics lamin thapui thawh nan an hmang thung.
Quarter hnuhnung ber bikah Jaylen Brown-a'n point 10 a hlawh chhuak a, player hrang hrangin a zawna vawi thum ngawt 3 points an vawm luh laite chuan fans thawm a ṭha hle. Hemi quarter bikah hian 40-16 tehmeuha sang falin hnehna an chan theih phah.
Celtics hian NBA title vawi 17 an la tawh, champion hnem lamah Los Angeles Lakers nen an inzat. Kum 2010 hnua a vawi khat nan NBA Finals khel ve leh chauh ni mah se, sulhnu nei ṭha an nih avangin Warriors an barakhaih hi a mak lo.
Eng nge an sawi?
Warriors coach Steve Kerr chuan, "Boston Celtics khan chak an phu, hlauh nei miah loin min rawn hmachhawn. A bik takin quarter hnuhnung ber kha sawisel bo khawpin an khel, an phu ang ngeiin an chak," tiin an khingpui a fak.
Celtics tana point 26 neitu Al Horford chuan, "Hetiang hun hi hun rei tawh tak aṭanga ka lo nghah chu a ni, player ṭha tak tak kan neih avangin kan thil tih hi mak ka ti hran lo. Hei erawh kan hriat a ngai, nuamti takin basketball kan khel tawp mai tur a ni," a ti.
Hoford bakah hian Jaylen Brown (24 points), Derrick White (21) leh Marcus Smart (18) te an khel ṭha, an player pawimawh Jayson Tatum-a'n point 12 a nei bawk, game 2-ah pawh thil mak thlen nawn tir turin an ṭha tawk.
NBA Finals
Results & Fixtures
Game 1: Golden State Warriors 108 - 120 Boston Celtics
June 6, Thawhṭan
Game 2: Golden State Warriors 05:30 AM Boston Celtics
June 9, Ningani
Game 3: Boston Celtics 06:30 AM Golden State Warriors
June 11, Inrinni
Game 4: Boston Celtics 06:30 AM Golden State Warriors
June 14, Thawhlehni
Game 5: Golden State Warriors 06:30 AM Boston Celtics
June 17, Zirtawpni
Game 6: Boston Celtics 06:30 AM Golden State Warriors
June 20, Thawhṭanni
Game 7: Golden State Warriors 06:30 AM Boston Celtics
(Boston Celtics hian series-ah 1-0 in hma an hruai)