Yamaha-ah Quartararo a nghet

Fabio Quartararo chuan Yamaha bike a khalh chhunzawm zel dawn. MotoGP rider champion lai hian Yamaha tan contract thar a zik a, an inremna hi kum 2024 thleng daih a ni.

Quartararo hian tun season pawh a hmang ṭha, championship table-ah point riatin hma a hruai fal mek. MotoGP team dang nen inbiakna an nei tia sawi thawm awm chu tunah chuan a reh tawh ang.

Kum 23 mi Quartararo chuan, "Yamaha hian a tir aṭangin ka lakah rinna an nghat, kei pawhin an hmalak dan leh hmathlir ka ngaihtuah hian an hnena awmzel ka duh, ka tan chuan contract thar ziak tura thutlukna siam a harsa lo," tiin a sawi.

Season hmasa khan Quartararo hian intlansiak parukah hnehna a chang, podium-ah vawi 14 lawnin French rider zinga MotoGP champion hmasa ber a ni a, kuminah pawh champion tura rinkai ber a ni mek.

Pathianni tlai dar 5:30 hian Circuit de Barcelona-Catalunya-ah Catalan GP an tlan leh dawn, tun season chhung atana intlansiak pakuana tur chiah a ni ang.