MBA Inter-District Team Championship 2022 ; Aizawl South aia ropui zawk an awm lo

Ecosave Mizoram MBA Inter-district team cham-pionship 2022-a thiam ber chu District Badminton Association Aizawl South an ni - Mizoram Badminton Association hnuaia district level inelna sang ber hi Ningani khan khelh zawh a ni a, a pumpuia champion hnem ber DBA Aizawl South hi Overall Champions Trophy hlan an ni.

May 31 aṭang khan MBA Inter-district team championship inelna hi neih ṭan a ni a, Mizoram district hrang hrang aṭangin player ṭha an fuan khawm hnem hle. Ramhlun Indoor Stadium-a neih inelnaah hian category hrang hrang junior mixed team, senior mixed team, 35+ men's team leh 45+ men's team-ah te inelna neih a ni a, a tawpah Aizawl South khing phak an awm lo.

MBA Inter-district team cham-pionship-a category ngaihhlut hlawh ber Senior mixed team-ah pawh Aizawl South an chungnung ber a, final-ah District Badminton Association Aizawl North nen inhmachhawnin inkhel a hmuhnawm hle - a tawpah 3-1 in Aizawl South an chak a, champion nomawi an chawi haw.

Aizawl South hian 45+ men's team-ah pawh awlsam taka hnehna changin an champion a, junior mixed team leh 35+ men's team-ah erawh Champhai district chuan pakhatna dinhmun an hauh thung.

MBA Inter-District Team Championship 2022
Junior Mixed Team
Champions Champhai District Badminton Association
Runners up District Badminton Association Aizawl South
Senior Mixed Team
Champions District Badminton Association Aizawl South
Runners up District Badminton Association Aizawl North
35+ Men's Team
Champions Champhai District Badminton Association
Runners up District Badminton Association Aizawl South
45+ Men's Team
Champions District Badminton Association Aizawl South
Runners up District Badminton Association Aizawl Central