Juve chakna Paulo Dybala goal mawi

Italian champion Juventus tan Cristiano Ronaldo-a'n penalty a chhuih luh hnuah Paulo Dybala chuan goal mawi bik a khung a, an mikhualna ramah Bologna chu 2-0 in an luhchhuah.

Coppa Italia final-a an tlawm hnuah Juve an tho chhuak leh nghal, a zawna a season kua nan Serie A nomawi chawi an beisei. Pahnihna Laizo lakah point liin hma an hruai fal, match khatin an khel hnem thung.

Thawhṭanni zan inkhel dangah AC Milan chuan Lecce 4-1 a luh chhuahin European football an beiseina an chhi nung a, season hmang ṭha lo Fiorentina erawh table mawngphah luahtu Bresica nen 1-1 a inhnehtawkin point an insem ve thung.

Renato Dall'Ara Stadium-a inkhelah Ronaldo a langsar hmasa, Portuguese forward hian hnai tak aṭanga hun ṭha a hloh hnuah penalty a khung - defender Stefano Denswil-a'n Matthijs de Ligt a tih tluk chu referee Gianluca Rocchi-a'n hmu fuh lo mah se VAR hmangin penalty an hmu.

Juve midfielder Federico Bernardeschi a hmuhnawm a, Italy international hian a hmaa awm Dybala tan ball a kheng pial zauh; Argentine forward hian a ball dawn chu rang taka vir puiin box pawn aṭangin a ke vei lamin a thlawh lut; keeper Lukasz Skorupski a phar thui thlawn.

Bernardeschi-a'n hla deuh tak aṭangin goal ban a pet per dawp a, Ronaldo-a'n keeper chauh a hmachhawn tawhah a hlah bawk. Defender Danilo chu holam taka hnawhchhuah ni mah se goal chhuah loin point thum an hmu.

Coppa Italia semifinal inkhel pahnihah Juventus-in goal khat chauh an khung a, chu pawh penalty aṭanga Ronaldo khung a ni. Real Madrid star hlui hian penalty a hlah bakah final-ah goal an khung lo. League-ah erawh an mamawh zat goal an khung leh ta.

Old Lady manager Maurizio Sarri chuan, "Ka naute taksa a fit ṭha tawk a, a bik takin a tir aṭanga minute 70 thleng phei kha chuan sawisel tur awm mang loin an khel thei. A bik takin Bernardeschi khelh danah ka lawm, a ṭhiante tan hmun ruak a siam bakah inkhel cheimawitu a ni," a ti.

Goal mawi khungtu Dybala pawhin Bernardeschi fakin, "A hnungah ka awm tih a hre lo emaw ka ti a, ball harsa angreng tak kha awlsam deuhin min rawn pe thut. Lehlam defender an inrin hman meuh loh avangin hmun awl ka neih theih phah," tiin a sawi.