Arsenal leh Leicester an tlang

Premier League club Arsenal leh Leicester City te chuan Europa League knockout round an lut. Gunners hian an mikhualna ramah Molde 3-0 in an luhchhuah a, tun hnaia beisei phak lo Nicolas Pepe-a'n goal a khung.

Inkhel dangah Leicester tan an point khat hmuh belh chu tlang nan a tawk. Foxes hi an mikhual Sporting Braga lakah 3-2 in an hniam reng a, chak lo tura ngaih an ni hman. Mahse hun pek belhah Jamie Vardy chuan goal khungin a team a chhanhim.

Leeds United leh Arsenal inhnehtawk ṭumin Pepe hnawhchhuah a ni a, Gunners player manto ber hian sawisel a hlawh nasa hle. League match vawi thum a khelh theih dawn loh avangin Europa League lamah erawh inlantir a ni.

Ivory Coast international Pepe-a'n manager Mikel Arteta beisei a ti thlawn lo, minute 50-naah Joe Willock hnen aṭanga a ball hmuh chu rap dingin, chiang zetin Molde goal-ah a pet lut.

Goal khatna siamsaktu Willock a hmuhnawm chhunzawm a, English rawlthar hian Reiss Nelson goal khung tur a siamsak leh bawk. Gunners lam hian hun tawp hma deuhin Smith Rowe hmanga goal thumna khungin chak an nemnghet.

Arsenal manager Arteta chuan, "Pepe kha a tir aṭangin a khel ṭha hle, hun rei tak chhung chu khatianga a khelh chhuah hun kha ka lo nghak tawh. Goal a khung bakah hun ṭha a siam hnem, a thawkrim hle bawk a ni. Ngelnghet taka khelh ṭhat chhunzawm a tum tur a ni ang," a ti.

Gunners hian tun season Europa League match li an khelh tawhah hnehna an chang vek a, point 12 hmuin group B hmahruaitu an ni. League match khelh hmabak pahnih an la neihah player naupang zawk tan hun a inhawng zau lehzual ang.

Ningani zan khan Arteta naute hian North London pan nghal an tum a, mahse chhum zing nasa vangin thlawhtheihna a thlawk thei lo. Zirtawpni khan an haw chauh - Pathianni zan 12:15 hian Wolves an mikhual zui leh dawn a ni.

Khualmualah Leicester lamin ṭum thum ngawt si an phur hmasa. Al Musrati (4') leh Dias Fernandes (24') te hmangin vawi hnih hma an hruai pawt a, mikhual team lamin Harvey Barnes (9') leh Luke Thomas (78') te hmangin an sut.

Minute 90-naah Rodrigues Barbosa goal hmangin Braga bawkin hma hruai leh mah se, hun tawp hamrik a rik hma chiahin Vardy-a'n siphurh a sut zo a, point khat hlu tak an hlawh chhuak hram.

Group G inkhel dangah Zorya Luhansk chuan AEK Athens 3-0 in an hneh ve thung a, team pahnih hian point thum ve ve an nei. Table chung lama awm Foxes chu point 10 neiin an tlang a, pahnihna Braga (7 points) dinhmun a ṭha bawk.

Foxes manager Rodgers chuan, "Match khelh hmabak kan la neih hi chhut tel a ngai ṭhin, chumi ngaihtuah chunga point kan hmu thei hi a lawmawm hle. Player zawng zawng an khel ṭha, a bik takin Maddison leh Vardy ten danglamna an siam kha a ropui," a ti.

Braga lakah Rodgers hian a player neih ṭhat ṭhenkhat chu hahchawlhna hun a pe. Liverpool laka an mualpho hnua an match hmasa ber a nih avangin point hmuh hi a hlu, chutihrualin tun hnaia an tlarhnung phui lo hi a remphui dan an ngaihtuah a ngai ang.

Leicester City hian Thawhṭan zan dar 11:00-ah Premier League khel turin Fulham an mikhual leh dawn, Foxes hi table-ah palina nilai an ni a, an chunga awm Tottenham leh Chelsea an inhmachhawn dawn avangin an tan chak a pawimawh dawn.