Inter leh Lazio inlan hun

Coronavirus vangin Italian football an chawl rei a, an lo kir leh hnuah chuan hun awl nei mang loa an khelh chhunzawm char char a ngai. Zanin hian champion tura beisei la nei pahnih Lazio leh Inter Milan an inlan chhunzawm ve leh nghal ang.

Antonio Conte nauten zan dar 11:00-ah table laihawla mi Sassuolo an mikhual dawn. San Siro-a ni 100 chuang hnua an match neih leh hmasakah Sampdoria an hneh theih avangin zaninah pawh inrintawkna an nei sang ang. Italian manager Conte chuan league match an khelh hmabak zawng zawng chu 'Final' a ti.

Lazio chuan hripui len hnua an league match hmasa ber an khel ve dawn chauh. Simone Inzaghi naute hian Champions League khel phak zinga mi Atalanta an lenchilh dawn avangin a awlsam dawn lo tih a chiang

.

Serie A pahnihna ni lai Lazio hian league top scorer ni lai Ciro Immobile (27 goals) an nei a, tlarhma lam an ngaihtuah awm loh. Atalanta pawhin Serie A match 16 khelh aṭanga goal 13 khung thei Duvan Zapata an nei ve bawk, Colombia international striker hi Sassuolo lakah goal hnih khung hlim a ni.