Chennai-ah East Bengal an chesual ; Aizawl FC champion kawng a inhawng zau
East Bengal-in I League nomawi chawi an tum kawngah an tawlhthlu a, Chennai City laka goal khat a hma an hruai hnuaah goal hnih an chhuah leh avangin point hmu loin Chennai khawpui an chhuahsan.
Pathianni zan inkhel result avang hian Kolkata club lianin match li chiah khelh hmabak awmah Aizawl FC point thumin an pha lo a, Mizo club hi head to head-ah an ṭha zawk bawk. I League inkhel dangah Churchill Brothers leh Shillong Lajong te goal awm loin an inhnehtawk.
An inthlak danglam
East Bengal-in an mual Barasat Stadium-ah Churchill Brothers an hneh lo a, inkhel bul ṭantu zing aṭangin coach Trevor Morgan-a'n Chennai City hmachhawn turin player panga zet a thlak. Mizo tlangval Lalrindika Ralte pawhin match li chhung inkhel bul a ṭan loh hnuah midfield-ah hmun pawimawh a chang a, Trinidadian forward Willis Plaza a inlan bawk.
Chennai City lamin Haroon Amiri an chhuah zalen tawh a, amaherawhchu Afghan midfielder tel loin Bengaluru FC an draw tawh. East Bengal hmachhawn turin coach Soundararajan-a'n Brazilian forward Marcos 'Tank' Vinicius bul a ṭantir thung.
Mikhual tlangnel
East Bengal-in inkhel an thunun nghal a, Chennai City-in Tank hmanga an chance neih bak an neih chhunzawm lo a, Red and Gold erawhin mualneitu tlarhnung an chhaih buai hneh hle.
Mizo tlangval Didika Ralte chu player langsar a ni a, East Bengal midfielder hian goal kham a pet per bakah mawi taka Chennai tlarhnung a paltlang hnuah a pet over bawk. Minute 42-naah Rahul Bheke-a'n ding lam aṭangin duhthusamin ball a vawrh lut a, Plaza-a'n awlsam takin a tauh lut.
An mual a ni tlat
Chennai City-in khualmualah hneh an la nei lo a, Jawaharlal Nehru Stadium-ah chuan team dang an ni. Soundararajan-a'n first half-ah Brazilian Tank thlak nan Tamil forward Raegan Albarnas a luhtir a, Mizoram lamah pawh pet goal tawh striker hi second half-ah East Bengal tan a hnawksak.
Minute 57-naah Nandhakumar-a'n Reagen hnen aṭanga a ball hmu chu goal-ah petin East Bengal keeper Rehenesh-a'n a kap karah a chhuah. Hemi hnu hian Chennai an phur a, Reagen-a'n goal sirah chiah a pet leh bawk.
East Bengal-in point hnih an hloh dawna a lan laiin injury time-ah Brazilian striker Charles De Souza pet chu Rehenesh-a'n dang perin substitute Prasanth Karuthadathkuni-a'n chakna goal a khung a, Kolkata club-in point thum an hloh.
Chennai City hian I League match 14 an khel tawh a, khualmualah la chak lo vek mah se an mual aṭangin point 13 an hlawh chhuak. Tamil Nadu club hi pariatnaah awmin an hnuaiah Minerva Punjab leh Mumbai FC an awm.
East Bengal an buai?
Kolkata club-in India ram football-ah sulhnu nei ṭha mah se I League la champion lo an ni a, nomawi chawi an duh luatah pressure an ngah. Red and Gold hotu leh ṭantu zingah an coach Trevor Morgan chunga rinna nghat ngam lo an tam a, player ṭha an kawl hnem bawk avangin beiseina sang tak neih hi a awm lo hran lo.
East Bengal hian match hnuhnung pangaa point 15 hmuh theih tur aṭangin point ruk chiah an hlawh chhuak a, international break zawha an hmachhawn leh hmasa ber tur chu an hmelma Mohun Bagan an ni.
Red and Gold hian Mariners nena an inkhelh zawh hian DSK Shivajians, Mumbai FC leh Minerva Punjab te an la hmachhawn dawn a, Chennai City laka chak lo team tan point hlohna tur dang pawh la awmin lang mah se East Bengal theihna aṭanga thlir chuan match hnuhnung pathuma point kua hlawh chhuak thei tur an ni.
Aizawl FC lam hi
Aizawl FC hian champion an hnaih a, chhiarkawp dan aṭanga thlirin pangana aia hniamah an awm thei tawh lo bawk. Mizo club hian khualmualah match thum an nei a, RG Stadium, Mualpuia an hmachhawn tur pawh Mohun Bagan an nih avangin an hmabak a khirh hle.
Khalid Jamil-a hote hian Mariners bakah champion lai Bengaluru FC, Churchill Brothers leh Shillong Lajong an hmachhawn dawn a, point kua hmuha an champion theih tawh avangin nomawi chawi loa season an khar chuan kum khaw inchhirna tham a tling ang.