Quarterfinal-ah Juventus?

Zanin dar 1:15 hian Juventus-in Turin-ah FC Porto an mikhual dawn a, Champions League last 16 first leg hi Ten 1-ah a en theih ang. Old Lady hian Estadio Do Dragao-ah Porto hi substitute pahnih Marko Pjaca leh Dani Alves te goal hmangin 2-0 in an hneh a, Serie A club hian player 10-a khel an hneh avangin inchhuang thei erawh an ni lo.

Porto hian first leg minute 27-na leka hnawh­chhuah Brazilian left back Alex Telles an chhawr thei dawn lo a, amaherawhchu player 11-a an khelh tawh dawn avangin beisei tur erawh an la nei a, Juventus tan fimkhur a la ṭul reng bawk.

Italian club-in keeper ropui Gianluigi Buffon an kawl a, kum 39-a upa keeper hi ram tan vawi 167 a inlan tawh. Gigi Buf­fon hi Porto keeper Iker Casillas nen ram tana an khelh zat a inang chiah.

Nomawi chawi kawng­ah Casillas chung­nung zawkin Champions League nomawi vawi thum a chawi tawh a, Euro C'ship-ah vawi hnih champion tawhin World Cup-ah nomawi a chawi tawh bawk. Buffon erawh Italy club ropui ber zinga mi Juventus tan khel mah se Champions League-ah a la champion lo a, Italy erawh World Cup-ah a champion pui tawh thung.

Spanish goalkeeper Casillas hian Portugal-ah hun duhawm tak a hmang mek a, tun season league match vawi 25 a khelh tawh­ah clean sheet vawi 16 a nei a, Real Madrid a khelh laia season khata a clean sheet tam ber vawi 15 a khum.