Ranieri thlaktu Shakespeare fiahna

Leicester City-in zanin dar 1:15 hian King Power Stadium-ah Sevilla an mikhual dawn a, Champions League last 16 second leg hi Ten 2-ah a en theih ang.

Claudio Ranieri-a'n season liam ta khan Premier League-ah Leicester City a champion pui a, khawvel a barakhaih. Thla kaw hnuah Foxes-in Champions League knockout stage-ah Sevilla chu khualmualah 1-2 in an hneh lo a, English club hian khawvel an ṭhawng nawn. Hemi ṭumah thawm an neih dan erawh league nomawi chawi puitu Ranieri an ban vang a ni.

Leicester thuneitute thutlukna an dem rawn a, an chetsual an chan ṭhup laiin manager lai lawk Craig Shakespeare enkawlna hnuaiah Liverpool 3-1 in sawp a, coach thar hnuaia harhtharna chang Hull City 3-1 thoin an hneh leh bawk. Foxes hian Ranieri hnuaiah league-ah a zawnin vawi nga an chak tawh lo a, FA Cup-ah Millwall hneh loin an tla a, Italian manager hian season liam taa a hnahtawh avangin ban phu lo mah se a awm loh hnuah Leicester an khel ṭha tih phah rual a ni lo.

Tunah chuan Leicester-in manager lai lawk Shakespeare chu season tawp thlenga team enkawltu a nih tur thu an puang chiang tawh a, zanin hian kum 53-a upa English coach hian Europe-a inelna lian berah fiahna a hmachhawn dawn. Shakespeare hian season liam taa nomawi chawina kawnga player-te a duhsak nghal a, N'Golo Kante a neih tawh loh avangin Nigerian Wilfred Ndidi chiah player thar zingah inkhel bul a ṭantir a, Jamie Vardy leh Riyad Mahrez ten an thiamna an pholang ta bawk.

English club tan Vardy-a'n khualmualah goal khat a khung ve avangin Sevilla lakah beisei tur an nei a, own goal an neih miau avangin 1-0 a an chak a nih pawhin quarterfinal an lut ang. Amaherawhchu Jorge Sampaoli enkawlna hnuaiah Sevilla hi team ṭha an ni a, La Liga-ah Atletico Madrid chungah awmin an tluk loh chu Barcelona leh Real Madrid chauh an ni.

Sevilla hian kar tawpa Leganes an draw ṭumin Steven N'Zonzi a khel lo a, Blackburn leh Stoke midfielder hlui N'Zonzi hian kuminah vawi thum inkhel bul ṭan loin Spanish club hian an khingpui vawi hnih an draw bakah vawi khat an chak lo. Coach Sampaoli hote hi first leg-ah kawng engkimah an chungnung a, quarterfinal lut tur pawha rinkai an ni.