Mizoramin Maharashtra an hneh

Santosh Trophy vawi 71-naah Mizoramin an match hmasa berah nikuma an hneh loh Maharashtra 3-1 in an hneh nghal a, Group B inkhel dangah Punjab-in Railways 2-1 in an hneh bawk.

GMC, Bambolin-a inkhelah Mizoram tan V. Lalchhuanawma, Lalfak­zuala leh F. Lalrinpuia ten goal an khung a, Maharashtra tan Rahul Das-a'n goal khat a khung ve bawk. Mizoram hian March 15, Nilaini khian Tilak Maidan-ah Punjab an hmachhawn leh ang.

An khel ṭha

Mizoram tlarhmaah Mizoram Police-in thuneih­na an la a, Valpuia leh Lal­sangbera te inkawpin Police forward pahnih hian sir lam aṭangin Fakzuala leh Lalbiakhlua hnen aṭangin thlawpna an hmu bawk.

Minute riatna lekah midfielder Lalrinchhana ball vawrh luh chu keeper Harshad Deepak-a'n hmun himah nam per zo loin ONGC midfielder Chhuantea'n goal hmahruai a khung. Minute li hnuah Maharashtra right back Rahul Das-a'n box pawn aṭangin kawh zetin a pet goal a, Mizoram tlarhnung dem theih an ni lo.

Mizoramin inkhel an thunun a, minute 44-naah Ramfangzauva ball vawrh luh chu Chhuantea'n tauh thlain Fakzuala'n nalh taka a vir pui hnuah goal hnihna a khung.

Second half-ah pawh Mizoram an chungnung zui a, minute 51-naah Zautea through ball chu Sangbera'n ṭha takin a khalh lut a, a hmawr bawktu chu MPL4 best player Valpuia a ni.

Darkar khat pelh hnu­ah Chhuantea leh Lalmal­sawma chu inhliam vangin lakchhuah an ngai a, Mizoram insiamrem chhungin Maharashtra forward Vinil Poojary-a'n chance vawi hnih nei mah se keeper Lalruatpuia'n a dan sak ve ve.

Minute 77-naah Mizo­ram tan Lalbiakhlua'n goal khung theihna tur chance ṭha nei mah se Police winger hian a hmang ṭang­kai thei lo a, 3-1 in inkhel a tawp.

Eng nge an sawi?

Mizoram coach Lal­sang­zuala Hmar chuan, "Vawi khat khelhna a nih avangin kan nauten kan tactical move duhthusamin an pho chhuak thei lo a, amaherawhchu kan khelh dan erawh a lungawi thlak. Hei aia tam goal khung thei tur kan ni a, hnehna kan chang avangin ka lawm," tiin result-ah an lungawi.

Mizoram manager Lalthanzama Vanchhawng chuan, "Goa-ah khua a lum a, hei hi kan player-te inhliamna chhan pawh niin a lang a, an inhliam hi a na lutuk lo turah kan ngai. Maharashtra-in ball an vawrh nasa a, keini lamin lei hrulin kan khel a, first half-a kan khingpui khelh dan kan zir uluk chu second half-ah kan hlawkpui. Goa-a Mizo awmten min ṭawiawm ṭha a, an chungah kan lawm takzet a ni," tiin Vanglaini palai a hrilh.

Group A lam

Pathianni khan kumin Santosh Trophy match hmasa ber khelh a ni a, champion ngun ber West Bengal-in minute 90-naa Sheikh Faiaz goal hmangin Chandigarh 1-0 in an hneh hram. Group A inkhel dangah inelna thlengtu Goa-in Meghalaya 2-1 in an hneh bawk.

Goa-in minute 50-naa Latesh Mandrekar goal hmanga an hmahruaina chu Liston Colaco hmangin minute hnih hnuah an belhchhah a, Meghalaya lamin minute 55-naah U21 player Enestar Malngiang hmangin goal khat chhang let mah se goal dang an khung belh thei lo.

Vawiin hian West Ben­gal-in champion lai Services an hmachhawn ang a, point la hmu lo Chandigarh leh Meghalaya an inhmachhawn bawk ang.