All England champion Chong Wei
Khawvela badminton inelna upa ber All England Open-ah Lee Chong Wei a champion. Pathianni zana final khelhah Malaysian shuttler hian semifinal-a Lin Dan hnehtu Shi Yuqi chu 21-12, 21-10 a sawpin a vawi li nan nomawi a chawi.
Kum 34-a upa Chong Wei hi February 4 khan a khup a hliam a, a hliam vang hian All England Open-ah a inlan a beisei awm loh hman hle. Inelna ṭan a nih dawnah dam chiang lo chunga a inkhelh tur thu a ti chiang! Final khelh zawh a nih meuh chuan nakkumah pawh inlan leh ngei a tum thu a sawi.
Olympic silver pathum dawg tawh Chong Wei chuan, "He hmuna ka inkhelh hi chuan mahni ina inkhel ang maiin ka inngai ṭhin. Ka dam a nih phawt chuan nakkumah pawh ka inlan leh ang," tiin a sawi.
Chong Wei chuan sawi chhunzawmin, "Minṭantu an tam tih ka hria, anni puihna zara hetiang dinhmun thleng thei hi ka ni - ka match hmasa ber aṭanga a tawp ber thlengin min ṭawiawm ṭha tak zek," a ti.
Kum 1950 bawr chho khan Malaysian shuttler pahnih Wong Peng Soon leh Eddy Choong te chu All England-ah hian vawi li ve ve an lo champion tawh a, mah se khatih hunlai khan All England hi official takin world championship a la ni lo thung.
Hmeichhe inelna lamah Taiwan nula Tai Tzu Ying chuan All England final a vawi khat khelh naah hnehna a chang nghal, a khingpui Thailand nula Ratchanok Intanon chu 21-16, 22-20 a hnehin title a la ve bawk.
Kum 22-a upa Tai hian nikum November thla khan Ratchanok hi world number 1 dinhmun aṭangin a lo hnukthla tawh a, December thla a khelh zawh tak Superseries Finals-ah a hneh zui bawk - tunah badminton inelna ngaihhlut ber pakhatah a hneh leh ta a ni.