Federer, Nadal leh Djokovic chak nuamsa

Association of Tennis Professionals (ATP) World Tour Masters 1,000 zinga hmasa ber Indian Wells khelh mek­ah ni­min khan Roger Fe­de­rer, Rafael Nadal leh No­vak Djokovic ten an match hmasa ber khelin hnehna an chang vek - pla­yer langsar pathumte hi an chak chho zel a nih chuan semifinal hmun ruak inchuh thei dinhmunah an ding.

World number 1 An­dy Murray chu a match hmasa berah world number 129 Vasek Pos­pisil lakah a chak lo. 'Big 4' tia sawi ṭhin zinga pathum an la dam. Federer leh Nadal te hi an chak chho zel a nih chuan fourth round-ah an intum dawn a, a chak zawk chuan quarterfinal-ah Djokovic an hmachhawn thei dawn.

Grand Slam vawi 18 champion tawh Federer chuan minute 51 chhung lekin Stephane Robert 6-2, 6-1 in a hneh. In­khel dangah Nadal-a'n professional tennis kum 16 a khelh hnua a vawi khat nan Guido Pella a hmachhawn a, Spain tlangval hian 6-3, 6-2 in hnehna a chang.

World number 2 leh champion lai ni bawk Djokovic chuan Kyle Edmund 6-4, 7-6 (5) in a hneh. Serbian star hian Indian Wells bikah match 16 chhung chu a zawnin hnehna a chang tawh.

Grand Slam vawi 12 champion tawh Djokovic chuan, "Ka match leh­pekah Del Potro ka hma­­chhawn dawn a, ka theihna zawng zawnga ka khelh a ngai dawn, khawvela player ṭha berte zinga mi a nih avangin a hautak dawn hle," tiin a sawi.

Djokovic leh Juan Mar­tin Del Poro te hi zan­­in dar 10:30-ah an in­hmachhawn ang. Nikum Rio Olympic first round-ah khan Argentina tlangval Del Potro hian Djokovic hi a lo hneh tawh.