Reds kalkawng Burnley-in dang zo lo

Premier League season ṭan­­tirh khan Liverpool-in an match hmasa berah Arsenal chu khualmualah 4-3 in an hneh a, an match hnihnaah phur takin Burnley khelmual pan mah se rin loh takin 2-0 in an tlawm haw. Liverpool-in kar hmasa lawka Arsenal an hneh hnuah Pathianni zan khan Burnley an hmachhawn leh a, Anfield-ah erawh thawnthu hlui an thlen nawntir tawh lo - 2-1 in hnehna an chang.

Burnley tan Reds tlarhnung laka hnawksak tluan chhuak zak Ashley Barnes-a'n Kop barakhaihin goal hmahruai khung mah se Liverpool-in mualneitu an nihna an pholang a, khel ṭha lo zawk nichungin Georginio Wijnaldum leh Emre Can ten goal an khung avangin point thum hlu tak an hlawh chhuak - season thara Champions League khel turin an beiseina a nung zel.

Inkhel Chu

Anfield-ah Burnley an tlang­nel nghal a, an game-a mawi hle. Khualmuala inkhel ni mah se Turf Moor-a an mikhual ṭumin Liverpool an hneh tawh tih an la theihnghilh hman bik lo a, chak an tum - minute sarihna lekah an phu ang ngeiin goal hmahruai an khung a, Matthew Lowton-a ball pass fing zet chu Ashley Barnes-a'n a khung - Anfield-ah zaithawm a reh.

Mahse, Liverpool-in awl­sam taka tlawm an tum lo. Georginio Wijnaldum chuan first half hun pek belhah Divock Origi ball pek chu kheng sual zet mah se shot tura insiamrem thuaiin goal-ah a chantir a, Reds-in chawlhlawk hmain an si phurh an sut. Liverpool player-ten Burnley midfield inrem fuh karah an theihna tak tak pho chhuak thei lo mah se an khelmualah point hloh an duh lo.

Minute 61-naah Emre Can a inlar ve thung a, German midfielder hian Origi siam sak chu penalty area pawn aṭangin Burnley goal kilah a khung - Clarets (Burnley sawina) goalkeeper Tom Heaton tan dan chi a ni lo. Mikhual team tan hun tawp lamah Lowton chuan hun ṭha nei mah se hnai set sawt aṭangin goal chungah a pet a, Reds an chak.

Beisei phak lo Reds

Liverpool-in tun season Pre­mier League table-a paruk­na chin chunglam an hma­chhawnah tlawm hmel an la hmu miah lo a, tun season league match-a vawi nga an tlawm tawhna inkhel hi top ten hnuai lam an hmachhawnah vek a ni! Arsenal laka 3-1 a chak hlim Reds hi an dan pangngaiin Burnley lakah an talbuai a, inkhel ṭantir lam minute 30 chhungin vawi khatmah chance an insiam thei lo a, target-a shot an neih hmasak ber chu Wijnaldum si phurh sutna goal a ni - an vannei tih loh rual a ni lo.

Reds-in season thara Cham­pions League khel tura result hlawhchhuah chhunzawm an duh a nih chuan Philippe Coutinho chet ṭhat a pawimawh - Burnley lakah Brazilian midfielder hi hmuh tur a awm mang lo a, penalty area-ah Reds tana pass dik a neih chu vawi hnih chiah a ni! Sadio Mane a bang bik lo. Senegalese forward hian Emre Can hnen aṭanga a ball hmuh chu goal-a chantirna chance nei mah se a chhawr thei lo a, striker Divock Origi chuan vawi khatmah goal-ah shot a nei lo bawk!

Mahse, Liverpool tan lawmna tur a awm a, chu chu an khelh ṭhat loh nia point thum an hlawh chhuak thei hi a ni. Liverpool boss Jurgen Klopp chuan, "Khel ṭha lo chunga hnehna kan chan vawi khatna a ni a, ṭum dangah chuan hetianga kan khelhin kan chak ngai lo," a ti a, a naute khelh

ṭhat loh karah lawmna tur a hmu.

Eng nge an sawi?

Liverpool manager Jurgen Klopp chuan, "Burnley hma­chhawn hi chu a hautak ziah a, an theihtawp an chhuah avangin keini pawh thawhrim a ngai takzet. Chawlhlawk hmaa goal kan khung kha chu kan vannei tih phat rual a ni lo a, Emre Can goal khung kha a ropui takzet bawk," a ti.

Klopp chuan sawi chhun­zawmin, "Insiamṭhat ngaihna lai kan nei tih chu phat rual a ni lo a, ka lawmna erawh kan theihna angin khel chhuak lo mah ila huaisen taka kan bei kha a ni. Game hriatreng tlak a ni hauh lo a, a pawimawh ber erawh point thum kan hlawh chhuak kha a ni," tiin chak an phu bik loh thu a pha lo.

Burnley manager Sean Dyche chuan, "Reds khan theih­tawp an chhuah a, goal ropui an rawn khung bawk si avangin kan tan chuan a harsa a ni. First half goal kan chhuah dan kha a ho hret a, mah se kan khelh danah erawh inchhuang tur kan ni. A chang chuan chak turin vanneihna kan mamawh tel ve bawk ṭhin a ni," tiin a sawi.

Inkhel Chhehvel
• Liverpool-in Premier League-ah match 16 hnehna an channa chiah a ni a, 2015-16 season pumpuia an chak zat belhkhawm nen a in ang!
• Reds hian tlawm thei dinhmuna an din zet hnua point 14 an hlawhchhuahna a ni a, Tottenham nen hetiang dinhmuna ding chunga point hlawh chhuak hnem ber a ni.
• Ashley Barnes-a'n (10) Burnley tan Premier League-a goal khung hnem ber ni turin goal khat chiah a mamawh tawh - a phak loh chu Liverpool pan ta striker Danny Ings (11) a ni.
• August 2015 (vs West Ham, Manuel Lanzini) hnua Reds-in Anfield-a inkhel ṭantir minute 10-a goal an chhuah lehna hmasa ber a ni.
• Georginio Wijnaldum-a'n Premier League-ah goal 16 a khung tawh a, khualmualah vawi khatmah a la khung lo! ( Liverpool (5), Newcastle United (11))
• Jurgen Klopp-a'n Reds a enkawl hnuah box pawn aṭangin goal 21 an khung tawh a, Premier League club zinga box pawn aṭanga goal khung hnem ber an ni.