Dinthar hmachhawn tur Ramhlun North

Mizoram Premier Lea­gue club nei veng pa­hnih Dinthar leh Ramhlun North te chu vawiin chaw­hnu dar 1:00 PM hian Lam­mualah NECS Cup 2017 quar­ter­final luh in­chuhin an inkhel dawn - LPS Vision-ah live a ni ang.

MPL1 champion veng Dinthar-in an match hmasa berah Salem chu penalty shootout-ah an hneh hram a, match hnihnaah K. Ramdinthara goal hmangin Ramhlun Vengthar an hneh. Foot­ball ngaina veng Dinthar hian quarterfinal lut tur chuan an match pahnih khelh tawh aṭanga hma­sawn an ngai dawn.

Dinthar hmachhawn tur Ramhlun North hian D. Liansanga goal khat hmanga Chanmari West an hneh hnuah Phulpui 1-0 bawkin an hneh leh, an match hnuhnung zawkah hian Vanlalnghaka chuan goal awmchhun a khung. Ramhlun North hian goal la khung tam lo mah se an mamawh tawk an khung thei a, an goal an venghim ṭha bawk.

Chawhma dar 10:00-ah Aizawl khawpui pawn team ṭha Thingsulthliah leh Chite Veng an inhma­chhawn dawn bawk. Thingsulthilah hian last 16 lut tur hian Sakawrdai (2-0) leh Tuikual North (4-0) an sawp a, goal an la chhuah lo.

Thingsulthliah tan Joel Lalmuanpuia chuan an match hmasa pahnihah hian goal khat ve ve a khung. Joel bakah hian Tuikual laka goal hnih khung thei Isaac Vanlalruatfela an la nei bawk. Chite Veng hian Saikhamakawn laka hattrick siamtu David Lal­ro­ngenga an nei ve thung.

Aizawl DFA leh TṬ Royte Group ṭangkawpin an buatsaih NECS Cup last 16 hi tunkar chhunga khelh zawh tur a ni a, vawiin leh nakkumah Group A inkhelin Ningani leh Zirtawpniah Group B an inkhel ve thung ang.

LAST 16 FIXTURES
GROUP A
Vawiin Inkhel Tur
11:00 AM Chite Veng Vs Thingsulthliah
01:00 PM Dinthar Vs Ramhlun North
March 15, Nilaini
11:00 AM Venghlui Vs Ramhlun South
01:00 PM Republic Veng Vs Armed Veng South
GROUP B
March 16, Ningani
11:00 AM Luangmual Vs Chhinga Veng
01:00 PM Zemabawk North Vs Electric Veng
March 17, Zirtawpni
11:00 AM Chawnpui Vs Bawngkawn