Barca tlawm zanah Real tlawm duh lo
Champions League-a Paris Saint-Germain laka comeback ropui an lantir hnu lawkah Barcelona-in La Liga hmahruaitu nih an chhunzawm thei lo a, Pathianni zan khan Deportivo La Coruna chu khualmualah 2-1 in an ngam lo.
An elpui Barcelona tlawm zanah Real Madrid an tlawm ve duh lo a, an mikhual Real Betis nen goal khat ve ve khunga an inhnehtawk reng hnuah Sergio Ramos chuan minute 81-naah chakna goal a khung - La Liga table chung berah an awm leh ta.
Barca an tawlhthlu
Champions League khel chau Barca boss Luis Enrique-a'n PSG laka inlan aṭangin players panga a thlak danglam a, goal hnih khungtu Neymar chu inhliam vangin chawlh hahdamtir zingah a tel. Catalan club hian PSG laka comeback ropui lantir turin an rilru zawng zawng an seng tih a lang a, an chau a ni.
Minute 40-nah Deportivo-in goal an khung ta nge nge a, Joselu chuan Barcelona barakhaih turin hnai set sawt aṭangin a khung. Chawlhlawk hman a ni zui a, si phur chungin Barca player-ten dressing roon an pan. Second half ṭan a ni chiah tihin Luis Suarez chuan Catalan club si phurh sutna goal a khung.
Deportivo an vannei chhunzawm a, Alejandro Arribas ball tauh ṭha tak chu Barcelona goalkeeper Marc-Andre ter Stegen-a'n lo nam per hman mah se corner hmuh nan an hmang a, he corner aṭanga ball kal hi Alex Bergantinos chuan an chakna goal ni turin a khung - Suarez-a'n Barca tan goal a khung ṭuma Catalan club tlawm hmasak ber a ni. Uruguayan striker goal khungna inkhel 67-ah Barca hian hnehna changin vawi nga an khingpui an inhnehtawkpui.
PSG vang
Barcelona boss Luis Enrique chuan, "Kan inkhelh hma aṭang tawh khan PSG nena kan inkhel avang khan kan chau dawn tih a chiang sa a, keini pawhin chu chu kan hre lawk a ni. PSG lakah khan kan theihna zawng zawngin kan khel a, kan tawnhriat ang tho lo neive tawhte tan lo chuan kan dinhmun hi hriatthiam chi a ni lo," a ti.
Enrique chuan sawi chhunzawmin, "Match tin hi a harsa em em vek a, tun ang hunah chuan table mawngphah lama awm team te hi hmachhawn an harsa zual em ni chu aw tih mai tur a ni. Nomawi chawi kan tum a nih chuan theihtawp kan chhuah chhunzawm a ṭul ang," tiin a sawi.
Chhandamtu Ramos
Real Madrid-in an mikhual Real Betis laka an chakna goal khung turin minute 80 thleng an nghah a ngai a, goalkeeper Keylor Navas chetsual vang a ni. Costa Rican keeper hi Darko Brasanac nen chauh an inhmachhawn hnua Serbian midfielder a tih tluk avang hian hnawhchhuah phu mah se referee-in ngaihdan dang a neih avangin hnawhchhuah a ni lo.
Kum 30-a upa goalkeeper hian mualpho vawi khat a pumpelh hnuah a insiamṭhat phah lo a, minute 24-na lekah Antonio Sanabria goal shot chu an lamah a hui lut! La Liga champion tum goalkeeper tiha mawi lo a ni. Goalkeeper chetsual vangin Real an talbuai phah lo a, Cristiano Ronaldo chuan minute 41-naa Marcelo ball cross chu an si phurh sutna goal ni turin ṭha zetin a khung.
Betis defender Matteo Piccinini chu Lucas Vazquez laka a foul avanga minute 78-naa hnawhchhuah a nih hnu lawkah Real-in player tam zawk an nih an chhawr chhunzawm nghal a, defender goal khung thei Ramos chuan tun season-a a goal 10-na ni turin Real chakna goal a khung. Zinedine Zidane-a'n Alvaro Morata chu Karim Benzema aiah inkhel bul ṭantir mah se Spanish striker hian beisei a phak lo a, minute 20 a la awm tihin Benzema hian a thlak.
Zidane a hlim
Real Madrid coach Zinedine Zidane chuan, "Kan game kha thlirletin ka lawm takzet a, a chhan chu point thum kan hlawhchhuah vang a ni. Kan beisei angin engkim a kal vek lo a ni thei a, mah se hei hi chu thil thlen dan pangngai ve reng a ni. Kan phu ang result kan hlawhchhuah avangin player-te zawng zawng hi hlimpui tur kan ni," a ti.
French manager chuan goalkeeper Keylor Navas chhan nghalin, "Tihsual hi chu inkhelin a ken tel ve reng a ni a, hun tawp dawna a save ropui takte kha hmuh hmaih chi a ni lo. Ka lawmna em em chu a chetsual hnuah pawh a ṭhianten an thlawp tlat kha a ni a, a tihsual aṭanga insiamṭha thuaiin point thum min hlawhchhuahpui a ni," a ti a, kum 30-a upa goalkeeper a chhan tlat.