PSG an tho chuak

Barcelona laka goal li an humhim zawh loh hnua an match hmasa berah Paris St-Germain chuan Lorient 2-1 in an hneh. Inkhel dangah Memphis Depay-a goal hnih hmangin Lyon chuan Toulouse 4-0 in an sawp bawk.

Pathianni zan French Ligue 1 inkhelah cham­­pion lai PSG tan Christopher Nkunku chuan yard 20 a hla aṭangin a club tana a league goal hmasa ber a khung a, Lorient forward Benjamin Jeannot chuan anmahni lamah a ti lut bawk - Lorient goal neihchhun hi Michael Ciani khung a ni.

Champions League last 16 aṭanga tla hlim PSG hian league match 29 an khelh tawh aṭanga point 65 hmuin table-a hmahruaitu AS Monaco chu point thumin an phak lo mek.

Inkhel dangah Man­chester United forward hlui Depay chuan Lyon tan goal hnih a khung bakah Christophe Jallet leh Maxwel Cornet ten goal khat ve ve an khung bawk. Lyon hian goal hmasa pa­thum ṭha taka an khung hnuah Depay-a'n yard 50 a hla aṭangin goal ropui a khung.

Kum 23-a upa Depay hian half way line bul lawka a ball chan chu vir puiin goal-ah a pet thut a, Toulouse keeper Alban Lafont tlanchhuah lai a nih avangin a let hman lo. Netherlands international Depay hian United aṭang­a Lyon a zawm hnuah league match-ah bik goal nga a khung tawh.